“Situata në Gadishullin e Koresë ka arritur pikën kritike, saqë lufta bërthamore mund të fillojë në çdo moment”, kështu ka deklaruar zëvendës ambasadori i Koresë së Veriut në Organizatën e Kombeve të Bashkuara, Kim In Rijong në Komitetin për Çarmatosje të Asamblesë së Përgjithshme.
Kështu, Koreja e Veriut i jep një ultimatum OKB-së se nuk do të negociojë kurrë për shkatërrimin e arsenalit të saj bërthamor, nëse SHBA nuk ndryshojnë politikën e tyre armiqësore.
Po ashtu, diplomati korean shtoi se pas testeve më të reja raketore dhe bërthamore, vendi i tij ka kaluar portën e fundit në rrugën drejtë të qenit fuqi bërthamore, me mundësi që të ndërmarrë sulm bërthamor, duke kërcënuar se i gjithë territori i SHBA-së është në rrezen e veprimit të raketave të Penianit.
Pak orë pas kërcënimit nga ana e Penianit, ka reaguar zëvendës sekretari amerikan të shtetit, John Sullivan, i cili tha se Washingtoni nuk e përjashton mundësinë e bisedave të drejtpërdrejta me Penianin.
Gjatë vizitës në Tokio, Sullivan theksoi se Uashingtoni është i përqendruar në diplomaci, për të zgjidhur problemin me Korenë e Veriut.
