Menjëherë pas deklaratës, në intervistën për “Presheva Jonë”, kanë ardhur kërcënimet e para në drejtim të kryetarit të Luginës së Preshevës, Jonuz Musliu.
Në intervistë ai tha: “Unë jetoj në Bujanocin e Kosovës. Kryeministri im është Rama. Shqiptarët etnik nga Lugina e Preshevës duhet të bashkohen me Kosovën.”
Jonuz Musliu thotë se kërcënimet janë bërë në emër të policisë serbe, duke i thënë se ‘do ta vrasin dhe do ta presin’.
“Kryesisht kanë qenë kërcënime në baza kombëtare, por edhe familjare. Më kanë thënë: ‘Pse nuk po shkon të jetosh në Shqipëri dhe në Kosovë, por po jeton këtu? Kjo ka ardhur pas deklaratës që kam thënë se kam refuzuar taksat e Serbisë dhe i marr ato shqiptare. Më kanë thënë ‘kemi me të vra, me të pre, nuk mund të bësh çka të duash në Serbi’”, ka deklaruar Musliu për gazetën “BotaSot”.
Kërcënimet kanë ardhur përmes Facebook-ut dhe telefonit, në emër të policisë serbe, e për këtë ai ndihet i rrezikuar dhe i ka njoftuar ambasadat dhe ministrat e jashtëm të Shqipërisë dhe Kosovës.
“I kam lajmëruar ambasadat dhe ministrat e Jashtëm të Kosovës dhe Shqipërisë. Ata janë duke e përcjellë situatën”, është shprehur Jonuz Musliu.
Teksa u pyet nëse ka siguruar mbrojtje, Musliu tha se e vetmja mbrojtje që ka është populli shqiptar i Luginës.
“Natyrisht që ndihem i rrezikuar, por njëherë nuk kam marrë mbrojtje. Nuk kam mbrojtje përveç popullit shqiptar që i kam në Luginën e Preshevës”, përfundoi kryetarit i Luginës së Preshevës.
