Unioni i Gazetarëve Shqiptarë ka reaguar për kërcënimet ndaj gazetarit Myzyraj. Përmes një reagimi në rrjetet sociale, Unioni i Gazetarëve Shqiptarë kërkon nga autoritetet ligjore që të zbardhet e vërteta dhe të identifikohen autorët.
Deklaratë e Unionit të Gazetarëve Shqiptarë
Kërcënimet ndaj gazetarit dhe aktivistit Myzyraj ekspozojnë agresivitetin si anonimë të ekstremistëve
Tiranë më 13 Mars 2024
Unioni i Gazetarëve Shqiptarë është vënë në dijeni prej publikimit në faqet sociale dhe mediave, se gazetari Isa Myzyraj, njëkohësisht aktivist për të drejtat e njeriut, është kërcënuar me jetë, ditën e martë, (të kësaj jave), përmes një emaili në adresën e tij elektronike dhe atë zyrtare të televizionit Ora News, ku aktualisht raporton.
Kërcënuesi i paidentifikuar, përmes imeileve të nisura në adresën personale dhe atë të medias, figuron të jetë një emër i huaj, i paidentifikuar.
Gazetari Myzyrajt në reagimin denoncues shprehet:
“Nuk mund ta them me saktësi nga ka ardhur ky kërcënim.
Ajo për të cilën jam i sigurtë është se kjo është bërë për shkak të punës sime si gazetar, por edhe si aktivist,”.
Sipas pretendimeve të kolegut, në imeilin anonim i drejtohen me një gjuhë urrjetjeje, anti-semite dhe homofobike.
UGSH shpreh shqetësimin publik ndaj këtij rasti dhe vlerëson gadishmërinë e stafit të medias për solidaritet dhe inkurajim ndaj kolegut.
Mbështet aktin denoncues të gazetarit dhe shpreh solidaritetin e plotë, duke u bërë pjesë aktive e kërkesës për hetim të rastit, identifikim të autorit apo autorëve dhe zbardhjen e arsyes reale për këtë kërcënim.
UGSH me shqetësim konstaton se hapësirat e online-it në shqip, përherë e më tepër, po përdoren nga ekstremistë dhe individë, struktura okulte dhe fanatikë, për të agresuar gazetarë apo ligjërues publikë.
Ky agresivitet i tyre ndaj gazetarëve dhe mediave përbën një kërcënim serioz për lirinë e shprehjes dhe atë të debatit në jetën publike të shoqërisë sonë.
Aktin denoncues dhe ndjekjen ligjore të këtij kërcënimi, UGSH e mbështet fuqimisht dhe inkurajon kolegun për ndjekje të përbashkët, deri në identifikimin e autorësisë dhe zbardhjen e qëllimit real të kërcënuesit ose kërcënuesve.
UGSH kërkon, nga autoritetet ligjore dhe veçanërisht ato të hetimit, të zbardhin të vërtetën, të identifikojnë dhe venë para përgjegjësisë ligjore, autorët e këtij kërcënimi.
Zyra Informuese
Unioni i Gazetarëve Shqiptarë
https://www.facebook.com/share/rP19qz8BCkAVxTTZ/?mibextid=WC7FNe
