Shkrimtari Ismail Kadare i ka dërguar një letër ambasadores së BE-së në Shqipëri, Romana Vlahutin, lidhur me ngjarjen e fundit të ditës së sotme ku u ndalua publicisti Kastriot Myftaraj, për të vrarë diplomaten.
Kadare, në këtë letër, shpreh tronditjen për fyerjen që i është bërë ambasadores dhe shprehet i gatshëm ti kërkojë ndjesë pasi mirënjohja për punën e saj është e madhe dhe e pacenueshme.
Letër për Romana Vlahutin, ambasadore e BE në Shqipëri
E nderuara Zonjë, Më lejoni t’ju drejtohem me këtë letër krejtësisht personale, për tronditjen që më shkaktoi sot fyerja e paskrupullt që u bë publikisht kundër jush në shtypin shqiptar.
Nuk është fjala për të sqaruar këtu se ç’është fyerja e një njeriu jo normal dhe se sa pak lidhje ka ajo me një popull e një shoqëri të tërë.
Megjithatë ajo fyerje u botua nga shtypi i vendit tim, kështu që në një mënyrë ose një tjetër na vuri para përgjegjësisë të gjithëve.
Ndonëse shkrimtar i njohur, nuk marr përsipër të përgjigjem për ato çka mund të ndodhin në këtë vend, për mirë apo për keq.
Do të doja thjesht të ndaja me ju pikëllimin që mund të ndiejë njeriu, i cili, në vendin ku vjen të ndihmojë për kapërcimin e brengave, ndeshet me një mosmirënjohje të tillë.
E dashur Romana Vlahutin, do të isha gati t’ju kërkoja ndjesë në gjunjë, për t’ju siguruar se mirënjohja për ju është e do të jetë e pacenueshme.
Ismail Kadare Paris, 10 maj 2017
