Zbardhet dëshmia e edukatores së kopshtit privat në kryeqytet, e cila dhunoi deri në thyerjen e këmbës një vajzë 3-vjeçare. Edukatorja ka mohuar kategorikisht se ajo i ka thyer këmbën vogëlushes, ndërsa sqaroi se vetëm e kishte goditur me shpullë.
Ajo ka dëshmuar se e ka kuptuar se vajza kishte dëmtuar këmbën kur e ka parë, por sipas saj 3-vjeçarja mund ta ketë dëmtuar te krevati, pasi aty ka hapësira. Majlinda Dehima deklaroi se pasi është zgjuar rreth orës 15:00 ka parë vajzën duke qarë dhe ka konstatuar këmbën e ënjtur.
Ajo rrëfeu më tej se pas kësaj ka vendosur në dijeni drejtoreshën e kopshtit, ndërsa kur është pyetur se pse e qëllonte vajzën ajo ka thënë “që të kishte vëmendjen sepse qante”. Edukatorja Majlinda Dehima është proceduar penalisht në gjendje të lirë, si e dyshuar për kryerjen e veprës penale “Keqtrajtimi i të miturve” për dhunën ndaj vajzës 3-vjeçare në ambientet e kopshtit “Stinët”.
