Në një postim në rrjetet sociale, drejtuesi politik i PD për Tiranën, Belind Këlliçi, ka prezantuar dy kandidatët e Partisë Demokratike për deputetë në Njësinë 14 të kryeqytetit. Ata janë Besim Kuka dhe Kreshnik Çollaku, të cilët, sipas Këlliçit, do të sjellin ndryshimin e shumëpritur për këtë zonë.
Në bashkëpunim me Kryetarin e FRPD, Besart Xhaferri, i cili është gjithashtu drejtues i fushatës elektorale për degën nr. 14, Këlliçi ka zhvilluar një takim me strukturat lokale, ku u diskutua mbi problemet që prekin banorët e zonës. Sipas tij, njësia administrative e Dajti dhe veçanërisht zona e Tufinës, po përballen me mungesa të mëdha infrastrukturore, duke përfshirë ndërprerje të energjisë elektrike, furnizim të pamjaftueshëm me ujë të pijshëm dhe probleme të tjera serioze në sektorin e kanalizimeve.
“Problemet janë serioze dhe indiferenca në investime është e prekshme. Ne premtojmë që pas 11 Majit kjo harresë do të marrë fund. Infrastrukturën do ta kemi prioritet të padiskutueshëm, dhe çdo qindarkë e buxhetit të shtetit do të rikthehet tek qytetari”, theksoi Këlliçi.
Postimi i drejtuesit politik të PD për Tiranën, Belind Këlliçi:
Sot sëbashku me Kryetarin e FRPD, njëherazi Drejtues Politik i fushatës elektorale për Degën nr.14 Tiranë, Besart Xhaferri, pata kënaqësinë dhe nderin të prezantoj dy kandidatët për deputetë në këtë degë të PD.
Përkrah drejtuesit të fushatës në këtë zonë dhe dy kandidatëve të nderuar z. Besim Kuka dhe z. Kreshnik Çollaku, biseduam nga afër me strukturat tona duke u njohur me problematikat e zonës dhe duke prezantuar programin e Partisë Demokratike.
Në të vërtetë, problemet janë serioze dhe indiferenca në investime e prekshme. Tufina dhe e gjithë Njësia Administrative Dajt, sot gjendet në kushte të padenja dhe përballet me mungesa serioze të energjisë elektrike, mungesa të furnizimit me ujë të pijshëm i cili vjen me orar dhe më pak se 6 orë në ditë. Mungesa të rënda të investimeve në infrastrukturë, duke nisur që nga problemi i kanalizimeve, etj.
Garantojmë qytetarët se kjo harresë e qëllimshme pas 11 Majit merr fund.
Partia Demokratike infrastrukturën e ka prioritet të padiskutueshëm dhe çdo qindarkë të buxhetit të shtetit do e rikthejë tek qytetari. Për të garantuar një jetesë dinjitoze dhe kushtet normale të funksionimit të një metropoli, i cili nuk mund të trajtohet më si një grumbull zonash të getoizuara dhe të harruara por si një organizëm i gjallë multipolar zhvillimi.
Të gjithë bashkë, për një Tiranë të jetueshme dhe njerëzore.
