2,42 miliard euro është vlera e gjobës së Komisionit Evropian ndaj gjigantit amerikan të internetit “Google” për abuzime në pozicion dominues në treg duke favorizuar aplikacionin e tij të krahasimit të çmimeve “Google Shopping”.
Në një rast të abuzimit të pozicionit dominues, gjoba më e madhe e vendosur ndonjëherë nga Brukseli arrinte deri në 1,06 miliardë euro, kundër gjigantit amerikan të mikroçipëve informatikë “Intel” në vitin 2009.
Komisioneria evropiane për Konkurrencën, Margrethe Vestager, tha se “Google ka abuzuar nga pozicioni i tij dominues në tregun e motorëve të kërkimit duke favorizuar shërbimin e tij të krahasimit të çmimeve në kërkimet e tij dhe duke ulur ato të konkurrentëve të tjerë.”
“Ajo që Google ka bërë është e jashtëligjshme në raport me rregullat e konkurrencës së BE-së. Ai ka penguar kompanitë e tjera që të zhvillojnë konkurrencën në bazë të meritave dhe inovacionit. Mbi të gjitha ka penguar konsumatorët evropianë që të përfitojnë nga një zgjedhje reale e shërbimeve dhe të përfitojnë plotësisht nga inovacioni”, shtoi ajo.
