Katër humbje në katër javë kanë vendosur fatin e trajnerit slloven të Luftëtarit, Milos Kostic. Drejtuesit kanë shkarkuar trajnerin dhe pas dy ditësh bisedime në krye të klubit është emëruar vlonjati, Gentian Mezani.
Pas mbledhje së drejtuesve është marrë ky vendim dhe më pas trajneri ka pasur një takim me presidentin e klubit Grigor Tavo dhe kanë rënë dakord që trajneri të largohet me marrëveshje. Trajneri slloven do të marrë një shumë parash, për të cilat palët kanë biseduar, pasi ai ka firmosur një kontratë trevjeçare me klubin.
Ish-trajneri i Laçit Gentian Mezani do të marrë në dorë ekipin gjirokastrit për ta drejtuar përgjatë edicionit në vijim. Ndërkohë, nuk është bërë e ditur se sa do të jetë kjo marrëveshje, por duhet thënë se për Mezanin ky është momenti i kthimit në pankinë pas largimit nga Laçi në fundin e sezonit të kaluar.
