Një shtetas gjerman është arrestuar nga policia e Kosovës, pasi rezultonte i dënuar me 20 vite burg në mungesë nga drejtësia gjermane.
Në pranga ka rënë shtetasi Qadir Ali Kan, i kërkuar nga INTERPOL-i, ndërsa raportohet se është kapur këtë të premte pas mesnate në Prishtinë.
Ali Kan akuzohet për trafikim droge. Ai u arrestua në orën 1 pas mesnate nga njësia «Fast» që shërben për kërkimin e të arratisurve.
Bajram Krasniqi nga zyra për informim në Policinë e Kosovës, ka konfirmuar lajmin për kapjen e të kërkuarit, shkruajnë mediat kosovare.
“Policia mbrëmë ka arrestuar një shtetas gjerman në kuadër të bashkëpunimit ndërkombëtar. I njëjti është i kërkuar nga autoritetet gjermane. Çështjet tjera siç është ekstradimi i tij, janë përgjegjësi e Ministrisë së Punëve të Brendshme”, ka thënë Krasniqi.
