Kreu i Lëvizjes Bashkë, Arlind Qori e cilëson situatën e ndodhur sot në Kuvend, një vazhdim të telenovelës PS-PD. Përmes një interviste televizive, Qori tha se kemi nevojë për një konceptim të ri të politikës që vjen nga poshtë dhe lidhet me klasat dhe grupet më të rëndësishme shoqërore.
“Do ta konsideroja atë që ndodhi në dyert e brendshme një vazhdim të telenovelës PS-PD. Ndërkohë që shqetësimet e vërteta të qytetarëve nuk gjejnë vend në këtë telenovele. Lëvizja Bashkë është në rrugë. Ishim bashkë me minatorët për të kërkuar statusin e tyre.
Kemi nevojë për konceptim të ri të politikës që vjen nga poshtë dhe lidhet me klasat dhe grupet më të rëndësishme shoqërore.”
Qori bëri me dije që prej ditës së sotme ai do të nisë një fushatë një mujore në Tiranë, dhe më pas në të gjithë Shqipërinë për t’i prezantuar njerëzve idetë bazë të Lëvizjes Bashkë.
“Po e korrim mbështetjen e qytetarëve ngado, punëtorët, pensionistët, të rinjtë që kërkojnë më shumë shpresë të angazhohen. Por nga ana tjetër gjejmë mbështetje mes shtresës së mesme profesioniste, mes njerëzve të mirëarsimuar që e kanë dhe një punë frymëzuese, por shohim si shteti degradon, si institucionet publike degradojmë.”
