Një konflikt mes fqinjësh në qytetin e Shkodrës ka përfunduar me kërcënime me armë zjarri. Policia ka vënë në pranga një 37-vjeçar dhe ka shpallur në kërkim një 22-vjeçar, të dy të dyshuar për kanosje me armë ndaj fqinjit të tyre.
Sipas njoftimit zyrtar, ngjarja ka ndodhur në rrugën “Tafilica”, ku pas një konflikti për motive të dobëta, shtetasit M. B., 37 vjeç, dhe A. G., 22 vjeç, të dy banues në Shkodër, dyshohet se kanë kanosur me armë zjarri pistoletë fqinjin e tyre, shtetasin E. K..
Falë ndërhyrjes së menjëhershme të Specialistëve për Hetimin e Krimeve të Komisariatit të Policisë Shkodër, në bashkëpunim me Patrullën e Përgjithshme dhe Forcën e Posaçme “Shqiponja”, u bë e mundur arrestimi në flagrancë i 37-vjeçarit M. B., ndërsa 22-vjeçari A. G. është në kërkim.
Dyshohet se ky i fundit, sapo ka parë forcat e Policisë, ka marrë armën e zjarrit dhe është larguar me vrap.
Policia po vijon punën për kapjen e 22-vjeçarit dhe për gjetjen e armës së zjarrit.
Materialet procedurale i janë referuar Prokurorisë së Shkodrës, për veprime të mëtejshme ligjore.
