Izmir Smajlaj, kampion i sapo shpallur në Ballkan dhe Europë, në disiplinën “Kërcim për së Gjati”, ka paralajmëruar se në të ardhmen mund të garojë për një flamur tjetër dhe jo për flamurin kuqezi.
“Që të gjithë të duan kur shpallesh kampion Evrope, duan të jenë pjesë e suksesit tënd, por, nga ana tjetër, që të arrish këtë duhen shumë gjëra: stërvitje, gjak e djersë dhe lekë. Të ofrojnë mbështetje, të thonë fjalën e mirë por nuk japin kokërr leku. Në këto kushte është shumë e vështirë të vazhdosh përpara për objektiva madhorë”, shprehet ai në intervistën për ”Konica.al”, duke thumbuar Federatën e Atletikës.
Më tej, Smajlaj për herë të parë pohon se ka pasur disa oferta nga shtete të ndryshme, sidomos nga Kroacia, të cilët po tregohen goxha këmbëngulës. Por sipas tij ende s’ka vendosur.
Shkodrani Smajlaj, para pak kohësh ka vendosur rekord kombëtar me kërcimin 8.08 metra.
