Javët e fundit duket sikur Egnatia ka humbur atë qetësinë që e ka karakterizuar deri tani. Një skuadër konstante, me cilësi, e cila pa shumë zhurmë rimori vendin e parë dhe prej javësh qëndron në krye. Mirëpo, mungesat e shumta për arsye dëmtimesh dhe rezultatet zhgënjyese me skuadrat që luajnë për mbijetesë, duket se kanë shtuar nervozizmin në kampin e kampionëve.
Të paktën, kjo gjë është vënë re javët e fundit, teksa çdo javë bardhejeshilëve u mungojnë lojtarë për shkak të pezullimeve me kartonë. Më shqetësues janë bërë kartonët e kuq, që po kthehen në “modë”, ku fillimisht para dy ndeshjesh u ndëshkua Regi Lushkja ndaj Dinamos dhe në sfidën e fundit Serxho Ujka përballë Tiranës, situatë kjo që tregon qartë një nervozizëm që po kalojnë kampionët, të cilët po e shfaqin më fushë. Ndoshta ngjeshja e ndeshjeve dhe grupi i cunguar ka sjellë edhe probleme të kësaj natyre në ekipin e drejtuar nga Edlir Tetova.
ANTI VLLAZNIA – Pas pushimit të shkurtër për shkak rë Kombëtares, Egnatia do të zbresë në fushë dhe përballë të kenë rivalin direkt, Vllazninë. Situata nuk është ndër më të mirat pikërisht për shkak të këtij nervozizmi që po e privon Tetovën të ketë në dispozicion më të mirët. Praktikisht, tri mungesave për arsye dëmtimesh, si: Albano Aleksi, Edison Ndreca dhe Renato Malota, rrogozhinasve u shtohen edhe tre të tjerë për arsye kartonësh.
Më konkretisht, Serxho Ujka është i detyruar të bëjë një javë “stop” pikërisht pas kartonit të kuq të marrë ndaj Tiranës. Sakaq, numrin “4” të kartonëve e kanë mbushur edhe Abdurraman Fangaj me Zamiq Alijev, duke lënë praktikisht të zbuluar skuadrën në prapavijë. Pa gjashtë titullarë në një nga ndeshjet më të rëndësishme të sezonit, është një situatë që nuk duket aspak në favor të kampionëve. Për këtë arsye, Tetova ka përpara një detyrë të vështirë, ku do i duhet që të “arnojë” si duhet skuadrën në një ndeshje delikate, ku vihet në rrezik edhe vendi i parë.
Për fat të mirë, do të kenë pak më shumë kohë në dispozicion për të provuar edhe manovrat dhe spostimet e duhura të lojtarëve. Kampionët në pesë ndeshjet e fundit kanë mundur vetëm Dinamon në shtëpi, ndërsa kanë sigluar një humbje me Skënderbeun dhe tri barazime, të gjitha përballë skuadrave që synim kanë mbijetesën.
