Pas zhurmës mediatike për frikën nga refugjatët, Ministria e Brendshme ka tentuar të shujë zërat, duke i cilësuar si “spekulime dhe keqpërdorime” sa i takon deklaratës së Hodaj. Ka qënë Zëvendës Ministri i Brendshëm, Julian Hodaj, i cili ndezi këtë zjarr. Gjatë një interviste për median gjermane ZDF, ai konfirmoi se Shqipëria mund të strehojë 600 mijë emigrantë sirianë.
Julian Hodaj: “Shqipëria ka kapacitet dhe eksperiencë për të strehuar deri në 600 mijë emigrantë sirianë. E ka treguar këtë edhe në të kaluarën, gjatë luftës së Kosovës”.
“Rama pranon 600 mijë refugjatë sirianë në Shqipëri, vetëm t’i hapen negociatat”
Për këtë, Ministria e Brendshme tenton të qetësojë qytetarët, duke njoftuar se:
“Pra përgjigjja lidhet me një situatë hipotetike emergjence, si ajo gjatë luftës së Kosovës, ku pati një angazhim shtetëror e popullor, dhe jo mbi një diskutim nëse një kamp mund të ndërtohet ose jo në Shqipëri”.
Në fakt, deklarata e Hodajt s’mund të jetë një rastësi, në një kohë kur flitet për shndërrimin e Shqipërisë në një pikë për strehimin e refugjatëve që kanë krijuar konfuzion në BE.
Përmendja e kesaj shifre nuk bëhet krejt rastësisht, në një kohë kur jemi para vendimit për hapjen e negociatave me BE-në.
Shqipëria, vendparkim refugjatësh? Plas sherri tek “Siguria”, Noka: Është për të vënë kujën, s’do flasim më shqip
“Nisur nga jehona mediatike e një kronike televizive të rrjetit gjerman ZDF, në datë 19.06.2018, me qëllim evitimin e spekulimeve dhe keqpërdorimeve të përmbajtjes së kësaj kronike, Ministria e Brendshme sqaron se:
– Ndërtimi i kampeve për emigrantë nuk është një çështje në shqyrtim, apo në diskutim. Askush nuk e ka kërkuar deri më sot dhe askush nuk e ka ofruar një gjë të tillë.
– Thëniet e zv.ministrit Julian Hodaj, të cituara në kronikë, janë përgjigjja e një pyetje konkrete:
“Çfarë mund të bënte Shqipëria në kushtet e një emergjence emigrantësh?”
Përgjigjja e kësaj pyetjeje është ajo që citohet: “Shqipëria e ka treguar gjatë luftës së Kosovës, se është në gjendje të përballojë këto emergjenca”.
Pra përgjigjja lidhet me një situatë hipotetike emergjence, si ajo gjatë luftës së Kosovës, ku pati një angazhim shtetëror e popullor, dhe jo mbi një diskutim nëse një kamp mund të ndërtohet ose jo në Shqipëri”, shkruhet në njoftimin e Ministrisë së Brendshme.
