Avokati Idajet Beqiri, i cili ka kallëzuar Belind Këlliçin në SPAK, ka dhënë detaje për akuzat që rëndojnë ndaj ish-kandidatit për kryebashkiak në Tiranë. Sipas Beqirit, ndaj Këlliçit rëndojnë dy akuza kryesore: falsifikim i dokumenteve dhe deklarim i rremë.
Beqirit theksoi se Këlliçi ka falsifikuar diplomën e gjimnazit, duke deklaruar se e kishte përfunduar atë në shkollën “Harry Fultz”, ndërkohë që kishte mbaruar vetëm vitin e katërt dhe nuk kishte kryer vitin e pestë. Ky falsifikim u përdor për të nisur studimet universitare në SHBA dhe për të bërë njësimin e diplomës në Shqipëri. Beqiri thekson se Këlliçi ka vazhduar të deklaronte se kishte përfunduar arsimin e mesëm dhe ka përdorur këtë diplomë të falsifikuar kur kandidoi për deputet dhe për kryetar bashkie të Tiranës.
Përveç falsifikimit të dokumenteve, Beqiri thekson se Këlliçi ka shantazhuar drejtoreshën e shkollës “Harry Fultz” për të marrë një deklaratë të rreme që do të konfirmonte se ai kishte mbaruar arsimin e mesëm, por kjo kërkesë nuk ka rezultuar e suksesshme. Avokati ka kërkuar gjithashtu hetim për fshehje pasurie, duke shtuar se Këlliçi nuk ka deklaruar shumicën e donacioneve që ka marrë gjatë fushatës elektorale për kryetar bashkie, si dhe nuk ka deklaruar pasurinë e bashkëjetueses së tij.
Beqiri e ka mbyllur intervistën duke theksuar se të gjitha këto akuza janë të bazuara në prova dhe se Këlliçi mund të përballet me deri 6 vite burg për këto veprime.
