Një video tjetër publikohet nga masakra me tre të vdekur në Shkodër.
Ndërsa ende nuk ka mbërritur policia dhe ambulancat, viktimat janë të shtrira në tokë dhe disa të rinj po i japin ndihmën e shpejtë dhe po lajmërojnë urgjencën.
Të vdekur mbetën Hamza Lici, Arlind Bushati dhe Flutura Basha.
Si ndodhi ngjarja?
Ngjarja tragjike që ndodhi në Shkodër ka lënë pas tre viktima dhe një të plagosur rëndë, duke shtuar tensionin dhe pasigurinë në zonë. Incidenti filloi kur një makinë në lëvizje, me autorë të paidentifikuar, qëlloi me armë drejt makinës ku ndodheshin Hamza Lici dhe Arlind Bushati. Hamza Lici ndërroi jetë në vendngjarje, ndërsa Arlind Bushati, që ishte goditur rëndë, nuk mundi t’i mbijetonte plagëve, duke ndërruar jetë në spital disa orë më vonë. Viktima e tretë, Flutura Basha, ishte një kalimtare që ndodhej me motor me bashkëshortin e saj, kur makina Benz, me të cilën udhëtonin Lici dhe Bushati, humbi kontrollin dhe e përplasi. Flutura ndërroi jetë si pasojë e plagëve, ndërsa bashkëshorti i saj, Bashkim Basha, vazhdon të jetë në gjendje të rëndë.
Pas ngjarjes, policia ka gjetur një makinë Land Rover të djegur në fshatin Grudë e Re, brenda së cilës u gjetën dy automatikë, që dyshohet se janë përdorur në atentat. Ndërkohë, në makinën e viktimave u gjetën tre pistoleta. Dyshohet që ngjarja të jetë një përplasje mes dy grupeve të njohura në Shkodër, Bajrat dhe Licët, të cilat kanë pasur përplasje të mëparshme.
Pak ditë para kësaj ngjarjeje, Arlind Bushati kishte raportuar një tentativë atentati ndaj tij, kur dy persona i afruan me motor dhe tentuan ta qëllonin. Ky rast i fundit ka tronditur opinionin publik dhe ka ngritur shqetësime për sigurinë dhe ndikimin e grupeve kriminale në Shkodër. Policia ka shoqëruar disa persona, por ende nuk ka identifikuar autorët e ngjarjes.
