9 Shtator 1957- Presidenti amerikan Eisenhower nënshkruan Aktin e të Drejtave Civile
Akti për të Drejtat Civile, një ligj që synonte kryesisht garantonte të drejtën e votës për të gjithë qytetarët amerikanë, ishte i pari në fushën e të drejtave civile i miratuar nga Kongresi në Shtetet e Bashkuara, dhe që do t’i hapte rrugë ligjeve të tjera për një integrim më të madh të zezakëve në jetën publike dhe sociale në vend.
Pasi u propozua në Kongres nga presidenti i atëhershëm, Dwight Eisenhower, senatori James Strom Thurmond mbajti fjalimin më të gjatë në histori prej afro 24 orësh, duke cituar ligje dhe dhjetëra libra, në përpjekje për të penguar miratimin e tij. Gjithsesi Kongresin e miratoi aktin me 270 pro dhe 97 kundër, ndërsa Senati me 60 vota pro dhe 15 kundër. Presidenti Eisenhower e dekretoi Aktin më 9 shtator 1957.
9 Shtator 1976- Vdes udhëheqësi komunist kinez Mao Zedong
Mao Tse-tung, figura e shquar e revolucionit komunist kinez, dhe udhëheqësi i vendit që nga viti 1949, u nda nga jeta në orët e para të mëngjesit të 9 Shtatorit 1976, në moshën 82-vjeçare, pasi kishte vuajtur nga një sëmundje e gjatë. Timonieri i Madh, pati një përkeqësim gradual të shëndetit për disa vite, dhe muajt e fundit nuk kishte pritur asnjë vizitor nga jashtë.
Mao e udhëhoqi Ushtrinë e Kuqe, fillimisht shumë e vogël në numër, drejt një fitoreje në dukje të pamundur mbi forcat nacionaliste në vitin 1949. Ai vazhdoi të udhëheqë Kinën për 27 vjet rresht. Brezat më të vjetër në Kinë ruajnë kujtesën e Maos edhe sot e kësaj dite, por trashëgimia e tij është rishikuar vitet e fundit. Sot, shumë kinezë e pranojnë hapur se disa prej politikave të Maos sikurse ishte edhe “Hopi i Madh”, qenë gabime të rënda, që i kushtuan jetën dhjetëra miliona kinezëve.
9 Shtator 1956- Elvis Presley bën prezantimin e parë në publik në “Ed Sullivan Show”
Ylli legjendar i muzikës botërore, u shfaq për herë të parë në shfaqjen e mirënjohur televizive të kohës “Ed Sullivan Show”. I veshur në mënyrë ekstravagante, ai e përshëndeti audiencën dhe më pas filloi të interpretojë këngën “Don’t be cruel”, duke nxitur një entuziazëm të madh në radhët e spektatorëve.
Pasi përfundoi këngën e parë, ai këngoi edhe një fragment të shkurtër të këngës së tij më të re “Love Me Tender”. Ky promovimin i dha frytet e veta, pasi në momentin e publikimit të albumit të tij parë këngëtari arriti të shesë miliona disqe, ku 1 milionë prej tyre ishin prenotuar paraprakisht.
Edhe pse në fillim Ed Sullivan ishte shprehur se s’do ta donte kurrë Elvisin në shfaqjen e tij, ndryshoi mendjen kur “Steve Allen Show”, e pati të ftuarin e vet pak ditë më herët, dhe kishte pasur rreth 2 herë më shumë shikues sesa shfaqja e Sullivanit atë mbrëmje.
9 Shtator 1948- Kim Il-Sung themelon Republikes Demokratike të Koresë së Veriut
Pas Luftës së Dytë Botërore, gadishulli korean u nda në dy pjesë përgjatë paralelit 38. Pjesa veriore u pushtua nga sovjetikët, ndërsa jugu nga amerikanët. Lufta e Ftohtë, e pengoi bashkimin e vendit, dhe më 9 tetor 1948, Kim Il-Sung shpalli me mbështetjen e Moskës, krijimin e Republikës Popullore Demokratike të Koresë.
9 Shtator 2015- Mbretëresha Elizabeta, bëhet monarkia me jetëgjatë e mbretërisë së Britanisë së Madhe. Ajo e theu rekordin e vendosur nga Mbretëresha Viktoria, e cila u ngjit në fron më 20 qershor 1837, dhe mbretëroi për 63 vjet, 7 muaj dhe 2 ditë.
9 Shtator 2007- Manuel Noriega lirohet pas 17 vitesh burgimi në Shtetet e Bashkuara. Ish-sundimtari ushtarak i Panamasë, ishte burgosur nën akuzat për trafik droge, pastrim parash, shantazhe dhe pengmarrje me qëllim përfitimi.
9 Shtator 1776 – Kongresi Kontinental, miraton zyrtarisht emrin “Shtetet e Bashkuara të Amerikës”, që do të përdorej në vazhdim në vend të termit “Kolonitë e Bashkuara”.
9 Shtator 1969- Në Kanada hyn në fuqi Akti i Gjuhëve Zyrtare, duke e bërë frëngjishten të barabartë me gjuhën angleze brenda administratës publike në vend.
9 Shtator 1993 – Organizata për Çlirimin e Palestinës, njeh zyrtarisht Izraelin si një shtet legjitim.
Përshtati për Tirana Today, Alket Goce
