21 Shkurt 1848 – Karl Marx publikon “Manifestin Komunist”
“Manifesti Komunist”, i shkruar nga Karl Marx me ndihmën e Friedrich Engels, botohet në Londër nga një grup socialistësh revolucionarë me origjinë gjermane, të njohur si Lidhja Komuniste. Pamfleti politik më me ndikim në histori, deklaronte se “historia e të gjithë shoqërisë së deritanishme, është historia e luftës së klasave”, dhe se fitorja e pashmangshme e proletariatit apo e klasës punëtore, do t’i jepte njëherë e mirë fund shoqërisë së ndarë në klasa.
I botuar fillimisht në gjuhën gjerane si “Manifest der Kommunistischen Partei” (Manifesti i Partisë Komuniste), ai pati pak ndikim të menjëhershëm. Megjithatë, idetë e tij u reflektuan me një forcë në rritje në shekullin XX-të dhe deri në vitet1950, kur gati gjysma e popullsisë së botës jetonte nën sundimin e qeverive marksiste.
Karl Marx lindi në Trier të Prusisë së dikurshme më 1818-ën. I ati ishte një avokat hebre, i konvertuar në luteranizëm. Marx studioi për jurisprudencë dhe filozofi në universitetet e Berlinit dhe Jenës, dhe ishte fillimisht një ndjekës i Hegelit, filozofit të famshëm gjerman të shekullit XIX-të, që kërkonte një sistem dialektik dhe gjithëpërfshirës të filozofisë.
Më 1842, pasi drejtoi për një kohë të shkurtër një gazetë lokale në Këln, Marx shkoi në Paris, asokohe një qendër e mendimit socialist. Aty ai përvetësoi formën më ekstreme të socializmit të njohur si komunizëm, që bënte thirrje për një revolucion nga klasa punëtore, i cili do të shkatërronte botën kapitaliste.
Në Paris, Marx nisi të shoqërohej me Friedrich Engels, një shok nga Prusia, me të cilin ndante pikëpamjet e tij, dhe do të shndërrohej në një bashkëpunëtor të përjetshëm. Më 1845, Marx u përjashtua nga Franca, dhe u vendos në Bruksel të Belgjikës. Gjatë dy viteve që pasuan, Marx dhe Engels zhvilluan filozofinë e tyre të komunizmit, dhe u bënë udhëheqës intelektualë të lëvizjes së klasës punëtore.
Më 1847, Lidhja e të Drejtës, një shoqëri sekrete e përbërë nga punëtorë gjermanë revolucionarë që jetonin në Londër, i kërkoi Marxit të bashkohej me organizatën e tyre. Marksi pranoi dhe e riemërtoi grupin si Lidhja Komuniste, dhe planifikoi ta bashkonte atë me komitetet e tjera të punëtorëve gjermanë në të gjithë Evropën. Dyshes, iu caktua detyra e hartimit të një manifesti që të përmblidhte doktrinën e Lidhjes.
Marx shkroi “Manifestin Komunist” në janar të 1848-ës, duke përdorur si model një trakt që Engels shkroi mbi Lidhjen një vit më herët. Në fillim të shkurtit, Marx e dërgoi punimin e tij në Londër dhe Lidhja e miratoi mënjeherë si manifestin e saj. Shumë nga idetë e shprehura në “Manifestin Komunist” nuk qenë të reja, por Marx kishte arritur një sintezë të fuqishme të ideve të ndryshme, nëpërmjet konceptimit të tij materialist të historisë.
Manifesti hapet me fjalët dramatike, “Një fantazmë po pëndjek Europën – fantazma e komunizmit!”, dhe përfundon duke deklaruar:”Proletarët nuk kanë asgjë për të humbur, përveç prangave të tyre. Ata kanë një botë për të fituar. Punëtorë të mbarë botës, bashkohuni!”
Më 22 Shkurt 1848 në Francë shpërtheu revolucioni, dhe dy ditë më pas mbreti Louis-Philippe u detyrua të abdikojë.
Revolucioni u përhap në të gjithë Europën kontinentale, po u shtyp shumë shpejt. Më 1864, Marx ndihmoi në themelimin e Shoqatës Ndërkombëtare të Punëtorëve – e njohur si Internacionalja e Parë – dhe më 1867 publikoi vëllimin e parë të “Kapitalit” – vepra themeltare e teorisë komuniste.
Kur ai vdiq më më 1884-ën, komunizmi ishte shndërruar në një lëvizje që merrej në konsideratë në Evropë. Njëzet e tre vjet më vonë, më 1917, Vladimir Lenini, një marksist, udhëhoqi revolucionin e parë të suksesshëm komunist në Rusi.
21 Shkurt 1972 – Presidenti amerikan Nixon zhvillon vizitën e tij historike në Kinë
Presidenti Richard M. Nixon mbërrin në Pekin, kryeqytetin e Republikës Popullore të Kinës, në vizitën e parë të një presidenti amerikan në vendin komunist. Meqënëse qeveria federale e SHBA-së, e kishte kundërshtuar zyrtarisht qeverinë komuniste të Kinës kur mori pushtetin në vitin 1949, Nixon ishte gjithashtu presidenti i parë që vizitonte një komb, qeverinë e të cilit Uashingtoni ende nuk e kishte njohur.
Në Pekin, Nixon u takua me kryetarin Mao Zedong dhe kryeministrin Zhou Enlai. Në Komunikatën e Shangait më 27 shkurt, Nixon dhe kryeministri kinez ranë dakord të ulin rrezikun e luftës mes tyre, të zgjerojnë kontaktet kulturore midis dy kombeve, dhe të ngrenë një mision tregtar të përhershëm të SHBA-së në Kinë.
Përveç kësaj, Shtetet e Bashkuara e pranuan politikën kineze të “një Kine”, dhe ranë dakord për një tërheqje graduale të trupave amerikane nga ishulli i Tajvanit. Të dy udhëheqësit, diskutuan gjithashtu fshehurazi mënyrat në të cilat ata mund të bashkëpunonin, për të kontrolluar rritjen e fuqisë sovjetike në Azi dhe gjetkë.
21 Shkurt 1437 – Vritet mbreti i Skocisë, Xhemjsi I.
21 Shkurt 1613 – Mikhaili I u zgjodh njëzëri nga Car nga një Asamble Kombëtare, duke filluar kështu sundimin e dinastisë së Romanovëve në Rusinë Perandorake.
21 Shkurt 1797 – Një forcë prej 1400 ushtarësh francezë pushtojnë Britaninë e Madhe në Fishguard, në mbështetje të shoqërisë së irlandezëve të bashkuar. Ata u mposhtën nga 500 rezervistë britanikë.
21 Shkurt 1808 – Pa një deklaratë paraprake lufte, trupat ruse kalojnë kufirin në Suedi në Abborfors të Finlandës lindore, duke filluar kështu Luftën Finlandeze, në të cilën Suedia do të humbasë gjysmën lindore të vendit (dmth Finlandën), që do t’i kalojë Rusisë.
21 Shkurt 1916 – Lufta e Parë Botërore: Në Francë fillon beteja e Verdunit.
21 Shkurt 1937 – Lidhja e Kombeve, vendos ndalimin e “vullnetarëve” të huaj në Luftën Civile Spanjolle .
21 Shkurt 1971 – Në Vjenë nënshkruhet Konventa mbi Substancat Psikotrope .
21 Shkurt 1974 – Ushtarët e fundit izraelitë, lënë bregun perëndimor të Kanalit të Suezit, në zbatim të një marrëveshjeje armëpushimi me Egjiptin.
21 Shkurt 1975 – Skandali i Watergate:Ish- Prokurori i Përgjithshëm i Shteteve të Bashkuara John N. Mitchell, dhe ish ndihmësit e Shtëpisë së Bardhë H.RHaldeman dhe John Ehrlichman dënohen me burgim.
21 Shkurt 1995 – Miliarderi Steve Fossett zbarkon në Saskatcheëan, Kanada duke u bërë personi i parë që kryen një fluturim vetëm mbi Oqeanin Paqësor, me anë të një balone me ajër të nxehtë.
Përshtati për Tirana Today, Alket Goce
