18 Shkurt 1564 – Vdes piktori dhe skulptori i famshëm italian, Michelangelo Buonarroti
Michelangelo, lindi në Republikën e Firences, e cila ushtronte një ndikim të pashembullt në zhvillimin e artit perëndimor në periudhën e Rilindjes. I cilësuar si artisti më i madh i gjallë gjatë jetës së tij, ai është përshkruar edhe si një nga artistët më të mëdhenj të të gjitha kohërave. Gjenialiteti i tij artistik ishte aq i madh, saqë krahasohet vetëm me kolosin tjetër të Rilindjes italiane, Leonardo da Vinci.
Shumë vepra të Michelangelos në pikturë, skulpturë dhe arkitekturë, renditen ndër më të njohurat e artit botëror. Prodhimtaria e tij në këto fusha, ishte e jashtëzakonshme. Duke pasur parasysh vëllimin e saktë të korrespondencës së mbijetuar, skicave dhe kujtimeve, ai është artisti më i mirë i dokumentuar i shekullit XV.
Michelangelo realizoi dy nga veprat e tij më të njohura, Pieta dhe Davidi, para se të mbushte 30-vjeç. Megjithëse nuk kishte ndonjë vëmendje të veçantë ndaj pikturës, ai realizoi dy nga afresket më me ndikim në historinë e artit perëndimor:skenat biblike nga Zanafilla në tavanin e Kapelës Sistinë në Romë, dhe Gjykimin e Fundit.
Në moshën 74-vjeçare, ai zëvendësoi Antonio da Sangallo të Riun, si arkitekti zyrtar i Bazilikës së Shën Pjetrit në Vatuikan. Ai e shndërroi projektin në mënyrë që pjesa perëndimore të përfundonte me dizajnin e tij, me disa modifikime të vogla pas vdekjes së tij. Michelangelo, ishte artisti i parë perëndimor, biografia e të cilit u botua qëkur ai qe gjallë.
Në fakt, dy biografi u botuan gjatë jetës së tij. Njëri prej biografëve, Giorgio Vasari, pretendonte se vepra e Michelangelos, e tejkalonte atë të çdo artisti që jetonte ende apo kishte vdekur. Në jetën e tij, Michelangelo shpesh quhej “Il Divino” (Hyjnori).
Bashkëkohësit, shpesh e admironin për aftësinë e tij për të nxitur ndjenjën e frikës. Përpjekjet e artistëve të mëvonshëm për të imituar stilin pasionant dhe shumë personal të Michelangelos, rezultuan në krijimin e rrymës së manierizmit, lëvizjes së ardhshme madhore në artin perëndimor pas Rilindjes së Artë.
18 Shkurt 1943 – Nazistët arrestojnë udhëheqësit e lëvizjes së rezistencës “Trëndafili i Bardhë”
Hans Scholl dhe motra e tij Sophie, udhëheqësit e grupit rinor gjerman Weisse Rose (Trëndafili i Bardhë), arrestohen nga Gestapo për kundërshtimin e regjimit nazist. Lëvizja përbëhej nga studentë universitarë (kryesisht mjekë), që shpreheshin kundër Adolf Hitlerit dhe regjimit të tij. Themeluesi, Hans Scholl, kishte qenë dikur anëtar i Rinisë Hitleriane, por u zhgënjye me ideologjinë naziste, sapo u bë i qartë qëllimi i saj i vërtetë.
Si student në Universitetin e Munihut në vitet 1940-1941, ai u takua me dy njerëz katolikë të letrave që e ridrejtuan jetën e tij. Pasi ktheu vëmendjen nga mjekësia tek feja, filozofia dhe artet, Scholl mblodhi rreth tij miq të një mendjeje, të cilët gjithashtu përbuznin nazistët, dhe kështu lindi lëvizja “Trëndafili i Bardhë”.
Gjatë verës së vitit 1942, Scholl dhe një miku i tij hartuan 4 fletëpalosje, të cilat i ekspozuan rrugëve duke denoncuar mizoritë naziste dhe të SS-ve, duke përfshirë shfarosjen e hebrenjve dhe fisnikërisë polake, ndërsa bënin thirrje për rezistencë ndaj regjimit. Fletushkat ishin të mbushura me citime nga shkrimtarë dhe mendimtarë të mëdhenj, nga Aristoteli në Gëte, dhe bënin thirrje për rilindjen e universitetit gjerman.
Lëvizja, mbështeste organizimin e një elitë të arsimuar brenda Gjermanisë. Rreziqet nga një veprimtari e tillë qenë të mëdha. Jeta e qytetarëve monitorohej imtësisht, për të mos patur asnjë devijim nga besnikëria absolute ndaj shtetit. Edhe një vërejtje rastësore kritike ndaj Hitlerit apo nazistëve, mund të çonte në arrestimin nga Gestapo, policia sekrete të regjimit.
Megjithatë, studentët e lëvizjes rrezikuan të gjithë, të motivuar thjesht nga idealizmi, parimet më të larta morale dhe etike, dhe simpatia për fqinjët dhe miqtë e hebrenjve. Më 18 shkurt 1943, Hans dhe Sophie, lanë një valixhe të mbushur me fletëpalosje në ndërtesën kryesore të universitetit.
Në to thuhej:”Dita e llogaridhënies ka mbërritur, e larjes së hesapeve të rinisë sonë gjermane me tiraninë më të neveritshme që populli ynë ka përjetuar ndonjëherë. Në emër të gjithë popullit gjerman, ne kërkojmë nga shteti i Adolf Hitlerit kthimin e lirisë personale, thesarin më të çmuar të gjermanëve, për të cilën na ka mashtruar me mjeshtëri. Ata u zbuluan nga një pastrues, që i raportoi menjëherë tek Gestapo, e cila i arrestoi shumë shpejt. Motër e vëlla u dënuan me vdekje, me prerje koke më 23 shkurt 1943, një dënim i rezervuar për “tradhtarët politikë”.
18 Shkurt 1129 – Jeruzalemi, bie në duart e Frederikut II të Perandorisë së Shenjtë Romake.
Fitorja në kuadër të Kryqëzatës së Gjashtë, u arrit kryesisht falë një marrëveshjeje me udhëheqësin e Egjiptit, El-Qamili, që i kishte nën kontroll ato territore.
Si pjesë e kushteve të marrëveshjes, Frederiku merrte edhe kontrollin e Sidonës, Xhafës, Nazaretit, dhe Betlehemit, duke u dhënë të krishterëve qasje në bregdet, ndërsa El–Qamili ruante kontrollin e Kupolës së Shkëmbit, Xhamisë Al-Aksa, dhe Malit të Tempullit në Jeruzalem; të cilën do të lejoheshin të vizitonin edhe të krishterët.
18 Shkurt 1787 – Perandori austriak Jozefi II, ndalon punësimin e fëmijëve nën moshën 8-vjeçare.
18 Shkurt 1828 – Më shumë se 100 anije, shkatërrohen nga një stuhi e fuqishme në Ngushticën e Gjilbraltarit.
18 Shkurt 1873 – Udhëheqësi revolucionar bullgar, Vasil Levski, ekzekutohet me varje në Sofje nga ana e autoriteteve osmane.
18 Shkurt 1915 – Lufta e Parë Botërore:Gjermania nis një bllokadë tregtare ndaj Britanisë së Madhe.
18 Shkurt 1929 – Në Los Anxhelos të SHBA-së, jepen çmimet e para Oskar për arritje në kinematografi.
18 Shkurt 2001 – Agjent i FBI-së Robert Hansen, arrestohet për spiunazh për llogari të rusëve. Ai e pranoi fajin, duke shmangur kësisoj dënimin me vdekje. Hansen u dënua me burgim të përjetshëm.
18 Shkurt 2013 – Gjatë një grabitje të armatosur në aeroportin e Brukselit në Belgjikë, vidhet një sasi diamantësh me vlerë 50 milionë dollarë.
18 Shkurt 2014 – Të paktën 76 njerëz vriten dhe qindra mbeten të plagosur, në përleshjet midis policisë dhe demonstruesve në Kiev të Ukrainës.
Përshtati për Tirana Today, Alket Goce
