17 Nëntor 2006 – Vdes futbollisti i famshëm hungarez Ferenc Puskás
Ferenc Puskás, konsiderohet gjerësisht si një nga lojtarët më të mëdhenj të të gjitha kohërave.
Ai shënoi 84 gola në 85 ndeshje ndërkombëtare me Hungarinë, dhe 514 gola në 529 ndeshje në kampionatin hungarez dhe më pas atë spanjoll. Puskás u shpall kampion olimpik në vitin 1952, ndërsa e udhëhoqi kombin e tij në finalen e Kupës së Botës 1954, ku dhe u cilësua si lojtari më i mirë i turneut.
Ai fitoi tre Kupa Evropiane (1959, 1960, 1966), 10 kampionate kombëtare (5 hungareze dhe 5 spanjolle), si dhe 8 çmime individuale si golashënues. Në vitin 1958, 2 vjet pas Revolucionit Hungarez, emigroi në Spanjë ku luajti për ekipin prestigjioz të Realit të Madridit. Me këtë skuadër, ai fitoi 4 herë çmimin e golashënuesit më të mirë, në një kohë që shënoi 7 gola në dy finalet e Ligës së Kampioneve.
Në vitin 1995, Ferenc Puskás u shpall si golashënuesi më i mirë i shekullit të XX-të, nga organizata ndërkombëtare e statistikave në futboll, IFFHS. Pas u tërhoq si lojtar, Puskás u bë trajner, dhe kulmin e karrierës e arriti në vitin 1971, kur udhëhoqi ekipin grek të Panathinaikosit në finalen e kupës UEFA, të cilën e humbi 2-0 ndaj Ajaksit.
Pavarësisht nga arratisja e tij në vitin 1958, qeveria hungareze e fali atë plotësisht në vitin 1993, duke e lejuar të rrikthehej në vend, dhe të merrte përkohësisht detyrën e trajnerit të kombëtares hungareze. Në vitin 1998, Puskás u bë një nga ambasadorët e parë të FIFA/SOS Charity. Në vitin 2002, Népstadion në Budapest u quajt “Stadion Ferenc Puskás” në nder të tij”. Në tetorin e vitit 2009, FIFA njoftoi krijimin e çmimit të ri “FIFA Puskás”, që i jepet çdo vit lojtarit që ka shënuar golin më të bukur gjatë sezonit të kaluar.
17 Nëntor 1558 – Në Angli fillon epoka Elizabetiane
Mbretëresha Meri I, monarkia e Anglisë dhe Irlandës që nga viti 1553, vdes dhe pasohet në fron nga gjysmë-motra e saj 25-vjeçare, Elizabeta. Kjo e fundit i mbijetoi disa komploteve nga ana e katolikëve; edhe pse ngjitja e saj në fron u përshëndet nga shumica e lordëve anglezë, që ishin kryesisht protestantë, dhe shpresonin për një tolerancë më të madhe fetare nën një mbretëreshë protestante.
Elizabeta shfuqizoi menjeherë ligjet pro-katolike të Merit, dhe themeloi një Kishë Protestante të përhershme në Angli. Ajo u kundërshtua nga Papa, që refuzoi të njohë legjitimitetin e saj, si dhe nga Spanja, një komb katolik që ishte në kulmin e fuqisë së tij. Në vitin 1588, rivaliteti anglo-spanjoll çoi në një tentativë të dështuar të Spanjës për të pushtuar Anglinë, në të cilën Armata Spanjolle, forca më e madhe detare e botës në atë kohë, u shkatërrua nga stuhitë por dhe nga flota detare angleze.
Me rritjen e dominimit anglez në det, Elizabeta inkurajoi eksplorimet e territoreve të reja në bregun e Amerikës së Veriut. Me vdekjen e saj më 1603, Anglia u bë një fuqi e madhe botërore në çdo aspekt, dhe Mbretëresha Elizabeta mbeti në histori si një nga monarkët më të mëdhenj të vendit.
17 Nëntor 1421 – Mijëra njerëz vdesin nga përmbytjet masive në Holandë
Një stuhi e fortë me qëndër në Detin e Veriut, godet ashpër bregdetin perëndimor evropian. Rreth rreth 10.000 njerëz vlerësohet se humbën jetën në Holandë, nga përmbytjet që u shkaktuan. Qyteti i Dortit u shkatërrua plotësisht, dhe 20 fshatra të tërë u fshinë nga harta. Vërshimet qenë kaq të mëdha, saqë digat bregdetare nuk u arritën të riparoheshin plotësisht deri në vitin 1500. Kjo do të thoshte se shumica e Holandës, vazhdoi të përmbytej vit pas viti edhe pas asaj stuhie.
17 Nëntor 1869 – Hapet Kanali i Suezit
Pas 10 vitesh punime, dhe me një kosto të dyfishtë nga vlerësimi fillestar, hapet Kanali i Suezit. Duke u shtrirë nëpër istimin e Suezit në Egjiptit, nga Port Said në very dhe deri në Suez në jug, kanali lidhi Detin Mesdhe me Oqeanin Indian. Në vitin 1888 u nënshkrua Konventa e Konstandinopojës, që “garantonte lundrimin e lirë në Kanalit Detar të Suezit të anijeve të të gjitha kombeve”. Kanali është 192 km, dhe gjerësia e tij maksimale është 66 metra.
17 Nëntor 1917- Vdes skulptori i njohur francez Auguste Rodin
Edhe pse Rodin konsiderohet përgjithësisht si paraardhësi i skulpturës moderne, ai nuk pati si synim të rebelohej ndaj traditës. U shkollua tradicionalisht, pati një qasje të ngjashme me parimet bazë të traditës, megjithëse nuk u pranua kurrë në shkollën më të lartë të artit në Paris. Shumica e skulpturave të tij më të famshme u kritikuan ashpër gjatë jetës së tij, pasi binin ndesh me traditat mbizotëruese, në të cilat veprat ishin dekorative ose shumë tematike.
17 Nëntor 1969 – Nisin negociatat e para SHBA-Bashkimi Sovjetik për kufizimin e armëve strategjike
Negociatorët sovjetikë dhe amerikanë takohen në Helsinki të Finlandës për të filluar bisedimet për kufizimin e armëve strategjike (SALT). Bisedimet synonin të identifikonin mjetet, për të frenuar garën e shfrenuar të armatimit gjatë Luftës së Ftohtë. Negociatat vazhduan për gati 3 vjet, deri në nënshkrimin e Marrëveshjes SALT I në majin e vitit 1972. Ajo e kufizonte secilin prej 2 vendeve, të kishte jo më shumë se 100 platforma të lëshimit të raketave ndërkontinentale.
17 Nëntor 1903 – Partia Socialdemokratike Ruse ndahet në dy grupe:bolshevikët (shumica) dhe menshevikët (pakica).
17 Nëntor 1933 – Shtetet e Bashkuara, njohin zyrtarisht shtetin komunist të Bashkimit Sovjetik.
17 Nëntor 1939 – Nëntë studentë çekë ekzekutohen pas demonstratave anti-naziste, të shkaktuara nga vdekja e të riut Jan Opletal. Të gjitha universitetet çeke mbyllen, dhe më shumë se 1.200 studentë dërgohen në kampet e përqëndrimit.
17 Nëntor 1973 – Shtypet me gjakderdhje rebelimi studentor në Universitetin Politeknik në Athinës, kundër regjimit ushtarak në fuqi.
17 Nëntor 1997 – Në Egjipt, 62 njerëz vriten nga 6 ekstremistë islamikë jashtë Tempullit Hatshepsut.
Përshtati për Tirana Today, Alket Goce
