Para pak kohësh, disa portale greke publikuan një lajm për ministren e Mbrojtjes, Mimi Kodheli duke shpikur se ka punuar si një balerinë në një klub nate në Athinë.
Kodheli hapi një proces gjyqësor ndaj portalit grek të lajmeve ushtarake, “Militaire.gr” për shkak të shpifjeve të bëra në adresë të saj, ndërsa tashmë grekët janë tërhequr.
Portali grek dhe kryeredaktori i tij i kanë kërkuar ndjesë publike ministres shqiptare të Mbrojtjes për lajmin e publikuar më parë, se ajo kishte punuar si balerinë në një klub nate të Athinës në fillim të viteve ‘90.
Paris Karvunopulos, ka pranuar gabimin duke deklaruar se bëhej fjalë për një lajm të pakonfirmuar, të pavërtetë e që ka shërbyer si sulm i ulët ndaj ministres Mimi Kodheli.
“Nga verifikimet e mëvonshme rezultoi se lajmi ishte i pakonfirmuar dhe tërësisht i pavërtetë. Madje, në periudhën së cilës i referohet lajmi zonja Kodheli nuk ka qenë fare në Greqi.
Ndaj zotohemi se në të ardhmen do të verifikojmë dhe konfirmojmë çdo lajm dhe informacion që i referohet zonjës Kodheli. Pranojmë se lajmi i publikuar prej nesh ishte një koment politik, i cili u shfrytëzua në mënyrën më barbare nga një pjesë e caktuar e klasës politike dhe opinionit publik në Greqi, por edhe në Shqipëri”, shkruan portali në fjalë.
