Joshua thumbon Wilderin: Ke në tavolinë dhe revanshin

Anthony Joshua padyshim është kryefjala e boksit, pasi është kampion bote dhe mbanë 4 tituj. Por atij i ka mbetur edhe një titull për të arritur objektivin e unifikimit, i cili mbahet nga amerikani Deontay Wilder. Anglezi pasi mposhti neo-zelandezin, Joseph Parker i shpalli menjëherë sfidë amerikanit dhe tashmë duket se me anë të menaxherit të tij Eddie Heran i ka dërguar edhe një ofertë të parezistueshme ku përfshihet edhe revanshi.

“Nëse Wilder më dërgon një marrëveshje edhe unë do t’i dërgoj një të tillë nga ana ime. Të vijë të duelojë për 4 titujt kampionë bote që kam unë, duke përfshirë edhe revanshin. Unë jam gati t’ia rrëmbej titullin që ka”, u shpreh Joshua, 21 fitore dhe asnjë humbje si profesionist, ndërsa rivali amerikan numëron 40 fitore, të gjithë të fituara.

“Wilder është 100% në vëmendjen time, për t’u përballur me të. Unë besoj se kjo ofertë do t’i mbyllë përfundimisht spekulimet dhe fjalët e tij. Një ofertë që do ta bëjë të ngjitet në ring”, deklaroi Anthony Joshua. Dueli mes dy boksierëve kampionë bote mund të zhvillohet në muajt e fundit të 2018-ës, madje përflitet se ata mund të zhvillojnë edhe nga një përballje tjetër në verën e këtij viti para se të kryqëzojnë dorezat mes tyre.