Këtë të enjte, bashkëpunëtori i drejtësisë, Nuredin Dumani, vazhdoi dëshminë e tij në kuadër të mega-procesit të njohur si “Plumbi i Artë”.
Ai dha detaje të reja për porositë për vrasje, bashkëpunëtorët dhe mënyrën e komunikimit mes anëtarëve të grupeve kriminale.
Gjatë seancës, u shënua një moment tensioni kur avokati Ilirian Duzeni braktisi sallën e gjyqit pas një komenti të Dumanit, i cili i tha: “Je në ofertë”.
Sipas avokatit, ky ishte një kërcënim i pastër, ndërsa ai e konsideroi si një presion. Duzeni tha se fjalët e Dumanit nënkuptonin se ai kishte qenë në listën e atyre që mund të vriteshin dhe se ai e mori këtë si një kërcënim ndaj tij, duke u larguar nga salla në shenjë proteste
“Ndoshta reagova gabim duke u larguar, por kjo është një çështje që duhet të tërheqë vëmendjen. Nuk mund të lejoj që të tallesh, qoftë dhe për faktin që jemi përfaqësues ligjorë. Jam ndjerë i prekur, sepse ai më drejtoi fjalët e tij personalisht. Nuk mund ta përballoj këtë presion, se ai është trim dhe unë frikacak. Në momentin kur ai përdori fjalët e tij ndaj meje, nevojitej që të reagoj, dhe për këtë arsye kërkoj që tërhiqemi dhe seanca të shtyhet. Kjo nuk është një çështje që mund ta kalojmë në heshtje, sepse këto mesazhe që po na jepen janë të papranueshme. Pas konsultës me Kryetarin e Dhomës së Avokatëve, vendosëm që tërheqja ishte veprimi më i duhur në atë moment. Nuk mund të vazhdojmë të përballemi me këto lloj situatash”, tha avokati Ilirian Duzeni.
Më pas në sallën e gjyqit ka pasur nje debat mes avokates Elda Zotaj dhe prokurorit të SPAK Behar Dibra.
Avokatia Elda Zotaj ka deklaruar se në zyrën e Prokurorisë ka kërkuar që të niste procedimi për kanosje ndaj bashkëpunëtorit të drejtësisë, Nuredin Dumani. Ajo shtoi se prokurori që po merret me çështjen, i ka thënë se “je në besë time, nuk do ta prek Nuredin Dumanin”, duke e konsideruar këtë një situatë të rëndë.
“Kërkova që Prokuroria të niste procedim për kanosje ndaj Nuredin Dumanit”, tha avokatja.
Nga ana tjetër, prokurori i SPAK, Behar Dibra, ka reaguar ndaj deklaratës së avokates, duke sqaruar se nuk ishte qëllimi i tij të krijonte tension.
“Nuk ishte qëllimi im të krijoja këtë situatë. Duhet të shihni shkaqet që çuan në atë deklaratë. Dumani është i pandehur në këtë proces, jo dëshmitar. Masa duhet të merren ndaj personit që provokoi situatën. Ajo që thotë avokatja janë shpifje, dhe për këto duhet të ngrihet kallëzim ndaj meje. Shkoni dhe bëni kallëzimin aty ku duhet. Këto deklarata bëhen me qëllime të caktuara. Ju lutem, vazhdoni gjykimin,” tha prokurori Dibra.
Gjithashtu, gjatë dëshmisë së tij, Dumani ka zbuluar se vendodhjen e tij në momentin e arrestimit në Fier, pasi kishte shpëtuar nga një atentat, ia kishte zbuluar Suel Cela.
Dumani ka treguar se Sueli i kishte thënë: “Do të sjell doktorin”, dhe më pas kishte marrë me vete Henrik Hoxhajn.
Ai ka shtuar gjithashtu se telefonatën me Suelin e ka pasur në prokurori dhe në polici.
