Bajram Jashanica është një ndër lojtarët më në zë të kampionatit i lidhur me merkaton, pasi lojtari është i kërkuar nga ekipe jashtë vendit. Skënderbeu duke respektuar dëshirën e lojtarit ka vendosur që ta nxjerrë në shitje, duke i vendosur si fillim një klauzolë prej 500 mijë eurosh.
Qendërmbrojtësi ka shprehur dëshirën për të luajtur në Belgjikë ku skuadra e Gent ka shprehur interes për të. Por mes dy klubeve nuk është gjetur akoma akordi financiarë. Marrëdhëniet mes dy klubeve janë të mira pasi pak vite më parë arritën të finalizonin edhe një transferim tjetër, ku Peter Olayinka nga Korça u transferua në Belgjikë për shifrën 1 milionë euro.
Presidenti Takaj ka konfirmuar se po shqyrton ofertat që kanë ardhur në drejtim të lojtarit, ndërsa ka rritur edhe çmimin e tij. Tashmë Skënderbeu nuk kërkon për 500 mijë euro për kartonin e lojtarit të Kombëtares së Kosovës, por diçka më shumë. Natyrisht që çmimi është rritur për shkak se disa klube janë interesuar për të pasur Jashanicën në përbërje të tyre.
