Deputeti i Partisë Demokratike, Dashnor Sula sfidoi mazhorancën, duke thënë se jep dorëheqjen nga mandati i deputetit, nëse punon inceneratori i Elbasanit pas datës 14 maj.Në fjalën e tij deputeti demokrat u shpreh se inceneratori i Elbasanit u vu në punë pak para zgjedhjeve vetëm për t’i hedhur hi sy shqiptarëve.
“Unë si deputet i qarkut të Elbasanit, sfidoj ju qeverinë, mazhorancën nëse inceneratori i Elbasanit punon pas datës 14 maj jap dorëheqjen. Punoi vetëm 2 javë para 14 majit për t’i hedhur hi sy shqiptareve sepse u bënë mal plehrat në Elbasan dhe nuk punon inceneratori.
Pyetja ime është e drejtpërdrejtë: A vlen kjo serë me plastmas e inceneratorit 310 mijë euro i financiar nga AZHBR, as 31 mijë euro nuk vlen.”-tha Sula.
Ndërkohë ministri i Brendshëm, Taulant Balla iu përgjigj duke i thënë se inceneratori punon dhe e “këshilloi” që të mos e djegë kot mandatin.
“Z. Sula, mos e digj mandatin kot, ose të paktën shko e digje nesër, kur do të digjen edhe 90 tonë mbetje në impiantin e trajtimit të mbetjeve në Elbasan.Po të duash shko edhe sot, por sot keni çështje tjetër.
Ka qenë në punë. Vetëm mos na digjni ‘Flamurin’ se ky na duhet. Por të tjerat digjini. Punon o Dash! Mos bëj premtime se ia ke marrë dorën kësaj që ‘e lëshoj mandatin’, ‘e lëshoj mandatin’.- u shpreh Balla.
