Këtë të hënë u nda nga jeta në moshën 88-vjeçare shkrimtari i mirënjohur Ismail Kadare.
Në një intervistë për Euronews Albania, Kadare bëri dhe daljen e fundit për media në mars të këtij viti. Në intervistën e tij të fundit Kadare, u pyet se si ndihet që libri i tij, “Kur Sunduesit Grinden” u shpall kandidat për çmimin “The Booker 2024”.
Kadare në përgjigjen e tij u shpreh se kandidimi i librit për “The Booker 2024”, i bën nder gjuhës dhe vendit nga përkthehet, ndaj ai ishte i gëzuar për këtë fakt.
“Gëzim, nuk ka fjalë tjetër! Nuk ka fjalë tjetër, çdo autor e mirëpret një vlerësim të tillë. Është një rol i rëndësishëm i çdo vepre i çdo shkrimtari në çdo gjuhë të botës. I bën nder shkrimtarit, gjuhës, vendit nga përkthehet. Çdo njohje e re në çdo gjuhë ndihmon edhe gjuhët e tjera që ta marrin e ta afrojnë një autor”,-tha Kadare.
Kadare u shua këtë të hënë në moshën 88-vjeçare, duke lënë pas një pasuri letrare që i bën nder kombit shqiptar dhe e rendit atë ndër shkrimtarët më të mëdhenj bashkëkohorë.
