Mark Iuliano, tekniku italian i Partizanit vazhdon të ngushëllohet me performancën e mirë që ka dhënë në fushë ekipi dhe ndjenë keqardhje për rezultatin që përfundoi ndeshja. Në përballjen me Kamzën ditën e sotme ku të kuqtë u mposhtën 1-0, ai shprehet se u mungoi vetëm goli dhe se gjithçka kishte shkuar mjaft mirë.
“ Është një mëkat, sepse skuadra po impenjohet por ka mjaftuar vetëm një episod për të humbur ndeshjet. Tifozët kanë të drejtë sepse duan rezultatet por më vjen vërtet keq pasi skuadra po luan mirë po krijon volum loje por nuk po shkojmë dot te goli”.
Është një kohë e vështirë për mua dhe ekipin, por është në dorën e drejtuesve se çfarë do të ndodhë. Unë do të vazhdoj të punoj të jap maksimumin bashkë me lojtarët dhe të shpresojmë që do të kthejmë rezultatet pozitive. Ne luajmë mjaft mirë dhe na kanë munguar vetëm golat, kjo gjë na ka penalizuar të gjithë punën që bëjmë në përgatitjen e ndeshjeve.
“ Puna ime është e vështirë, por unë jap gjithmonë maksimumin në atë që bëj. Krijojmë lojë por nuk shënojmë dhe kjo po na penalizon. Na ka munguar edhe fati. E ardhmja ime në stolin e Partizanit nuk është në dorën time, do të jenë drejtuesit ata që do të vendosin, unë dhe futbollistët po përpiqemi më të mirën tonë për këtë skuadër”.
Trajneri italian foli edhe për mungesat në ekip, pasi me ta në fushë do të kishin një pozitë tjetër në tabelën e klasifikimit. Shkarkimi i tij nuk është në të mirë të Partizanit, por për këtë gjë do të vendosin drejtuesit. Sa i përket merkatos së ardhshme ai nuk ka preferuar të komentojë, por ka ngulur këmbë që me rikthimin e lojtarëve të dëmtuar do të fitojnë çdo ndeshje.
“ Do më mjaftonte të kisha në skuadër futbollistët që mungojnë për arsye dëmtimi. Nuk mund të flas tani për merkaton. Nëse do të kishim lojtarët që na mungojnë do të kishim me siguri një pozicion shumë më të mirë në renditje. Pasi po dominojmë kundërshtarin dhe e vetmja gjë që nuk po arrimë janë rezultatet. Nuk mendoj se zgjidhja për të ndihmuar skuadrën është largimi im. Do të vendosin drejtuesit për të ardhmen time, ajo që unë mund të bëj është të punoj më mirë”.
