Një 56-vjeçar shqiptar është arrestuar nga policia italiane në Bolonja për posedim dhe shpërndarje droge.
Ngjarja ndodhi në “Via Pizzardi”, ku autoritetet vunë re një shkëmbim të dyshimtë mes shqiptarit dhe një italiani 59-vjeçar. Shqiptari i dorëzoi drogë, ndërsa mori në këmbim 100 euro.
Pas ndalimit të tyre, policia gjeti 26 mbështjellje kokaine me peshë 17.30 gramë dhe 470 euro cash në xhepat e shqiptarit.
Kontrolli u shtri edhe në banesën e tij, ku në një bodrum të pashfrytëzuar u zbuluan 782 gramë kokainë dhe 3630 euro të tjera. Shqiptari, i cili rezulton me precedentë penalë, u vendos në paraburgim pas vendimit të gjykatës, ndërsa italiani që bleu drogën po hetohet në gjendje të lirë.
