Një shtetas italian, D. S., 63 vjeç, me banim të përkohshëm në Tiranë, ka ndërruar jetë mëngjesin e sotëm në spital, dy ditë pas një ndërhyrjeje kirurgjikale në një klinikë dentare në Rrugën e Kosovarëve.
Sipas policisë, 63-vjeçari kishte kërkuar ndihmë mjekësore më 22 maj 2025, pasi nuk ishte ndier mirë pas procedurës së kryer më 20 maj. Pavarësisht trajtimit të ofruar në spital, ai nuk ka mundur të mbijetojë.
Specialistët për Hetimin e Krimit në Komisariatin e Policisë Nr. 2 kanë marrë në pyetje administratorin dhe dentistin e klinikës ku u krye ndërhyrja.
Materialet janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Tiranë, për vlerësim të mëtejshëm dhe për të përcaktuar nëse ka pasur neglizhencë apo përgjegjësi penale.
