Një 49-vjeçar nga Tirana, Naim Likometi, i shpallur i zhdukur më 8 mars 2025, është gjetur i pajetë në plazhin e Gjirit të Hartës.
Sipas burimeve, Likometi, i cili kishte një banesë në Ksamil, por jetonte në Tiranë, ishte larguar nga shtëpia rreth orës 06:00 të mëngjesit të 8 marsit dhe që prej asaj kohe nuk kishte pasur asnjë kontakt me familjarët apo miqtë.
Gjatë kërkimeve, policia gjeti në breg të detit një palë rroba dhe një telefon celular, të cilat u identifikuan nga familjarët si pronë e 49-vjeçarit. Mësohet se telefoni i tij ka qenë aktiv deri në orën 16:00 të datës 8 mars, pas së cilës ka rezultuar i fikur.
Policia po vijon hetimet për të zbardhur rrethanat e plota të ngjarjes dhe për të përcaktuar shkaqet e vdekjes së tij.
