Ish-lojtari, njëkohësisht trajneri aktual i Tiranës së moshave, Gentian Muça mesditën e kësaj të marte është parë pranë ambienteve të Prokurorisë së Posaçme kundër Korrupsionit dhe Krimit të Organizuar.
Muça është filmuar teksa së bashku me anëtarët e tjerë të Partisë Demokratike në Këshillin Bashkiak të Tiranës, kanë depozituar në SPAK dosjen për kullën që ka nisur të ndërtohet pas Teatrit të Operas dhe Baletit, në qendër të Tiranës.
Ish-lojtari i Tiranës shihet pas anëtares së opozitës në Këshill, Enriketa Papa, e cila tha se ky është vetëm hapi i parë dhe se Partia Demokratike nuk do të ndalet, por do të denoncojë aferat korruptive që bëhen në kurriz të shqiptarëve.
“Denoncojmë korrupsionin dhe ky është hapi i parë që ne bëjmë për të denoncuar dhe treguar dëshminë e angazhimeve dhe luftës së vazhdueshme të PD për aferat korruptive që bëhen në kurriz të qytetarë. Detajet e kallëzimit do të bëhen më tej në një deklaratë zyrtare”, tha Papa.
