Ish-mesfushori i Arsenalit, Thomas Partey, është zyrtarisht i akuzuar për pesë raste përdhunimi dhe një rast sulm seksual, njoftoi sot policia metropolitane e Londrës.
Sipas autoriteteve britanike, ngjarjet e dyshuara kanë ndodhur në periudhën 2021–2022. Dy nga akuzat për përdhunim lidhen me një grua, tri të tjera me një grua të dytë, ndërsa akuza për sulm seksual lidhet me një grua të tretë. Lojtari 32-vjeçar pritet të paraqitet në Gjykatën e Magjistraturës së Westminster-it më 5 gusht.
Në një deklaratë, policia britanike sqaroi:
“Akuzat janë ngritur pas një hetimi që nisi në shkurt të vitit 2022, kur policia mori raportin e parë për përdhunim. Prioriteti ynë mbetet ofrimi i mbështetjes për gratë që kanë vendosur të flasin.”
Avokati i Partey-t ka bërë me dije se lojtari i mohon të gjitha akuzat dhe ka bashkëpunuar plotësisht me policinë dhe prokurorinë gjatë hetimit trevjeçar.
“Thomas mirëpret mundësinë për të pastruar emrin e tij përfundimisht. Për shkak të procedurave ligjore në vijim, ai nuk do të komentojë më tej për momentin.”
Partey, i cili sapo është larguar nga Arsenali pas përfundimit të kontratës, thuhet se kishte tërhequr interesin e klubeve si Juventus, Barcelona dhe Fenerbahçe. Ai ka qenë pjesë e Arsenalit për pesë sezone që nga transferimi nga Atletico Madrid në vitin 2020, duke zhvilluar 130 ndeshje në Premier League, përfshirë 35 ndeshje sezonin e fundit, ku shënoi katër gola.
Policia Metropolitane u bën thirrje të gjithëve që mund të kenë informacion apo janë ndikuar nga rasti, të kontaktojnë autoritetet përkatëse.
