Ish-kreu i Komisionit Qendror të Zgjedhjeve (KQZ), Kristaq Kume, ka komentuar zhvillimet e fundit lidhur me votën e diasporës në Shqipëri, i ftuar në programin e drekës në News24.
Kume tha se dy krerët e politikës në Shqipëri, duke iu referuar Ramës dhe Berishës, kanë gjetur një çështje të ndjeshme, siç është vota e diasporës.
Sipas tij, politikanët po përdorin këtë çështje për të demonstruar angazhimin e tyre në procesin zgjedhor, por pa u përqendruar në asnjë aspekt tjetër të tij.
“Dhe nuk po merren fare me të. Çfarë bënë ndonjë gjë në 3 vitet e fundit? Thanë që po bëjnë shumë dhe bënë vetëm votën e diasporës, dhe e shesin si një produkt të bërë me shumë sakrifica dhe shumë të rëndësishëm për popullin. Kjo është mënyra e sjelljes së tyre dhe është e papranueshme,” u shpreh Kume.
Ai theksoi se tani kishte ardhur momenti kur u leverdis partive politike që të përfshinte votën e diasporës në Kodin Zgjedhor, duke e përdorur si një mjet për përfitime politike.
