Piloti amerikan Nicky Haiden, kampion bote në Moto GP në vitin 2006, është aksidentuar dje në zonën e Rimini, në Itali, teksa ishte duke u stërvitur me biçikletë me disa miqtë e tij.
Mësohet se 35-vjeçari vijon të jetë në gjendje të rëndë për jetën. Sipas përshkrimit që i bënë aksidentit miqtë e tij, Haiden u përplas nga një makinë e tipit “Renault”, në një rrugë province, në një qytezë afër Riminit.
Përplasja ka qenë e fortë dhe piloti amerikan ka përfunduar në xhamin e përparmë të makinës, duke e thyer atë, ndërsa biçikleta e tij ka përfunduar anës rrugës, thuajse e shkatërruar.
Hayden i është dhënë ndihma e parë në vend dhe më pas është transportuar me urgjencë në një spital në Rimini, ku është në gjendje të rëndë dhe nën mbikqyrjen e mjekëve. Ende nuk ka asnjë prognozë për gjendjen e tij. Këtë vit, Hayden garon në Superbike me ekipin Honda.
Në buletinin mjekësor të ditës së sotme, mjekët raportojnë se gjendja e tij mbetet e pandryshueshme dhe se Hayden vijon të qëndrojë në repartin e reanimacionit.
