Vdekja e liderit suprem të Iranit e ka futur gjithë Lindjen e Mesme në flakë. Teherani ka sulmuar të gjithë aleatët amerikanë në rajon, ndërsa Izraeli dhe Shtetet e Bashkuara të Amerikës kanë vijuar të godasin bazat ushtarake dhe rezidencat qeveritare iraniane.
Edhe ato pak shpresa për një ndërprerje të konfliktit pas lajmeve nga mediat amerikane se presidenti Trump është shprehur se Teherani kishte kërkuar të riniste bisedimet, janë shuar shumë shpejt.
Ali Larijani, sekretari i Këshillit të Sigurisë Kombëtare të Iranit, ka hedhur poshtë pretendimet e medias amerikane se ka kërkuar të rifillojë bisedimet me Uashingtonin.
Në këtë mënyrë sulmet iraniane kanë vijuar duke goditur disa vende të Gjirit Persik. Kështu, në Bahrein raportohet për 2 viktima. Gjithashtu, raportohet se është goditur me dronë një bazë britanike në Qipro.
Nga ana e tij, presidenti i Shteteve të Bashkuara, Donald Trump, ka deklaruar se goditja ndaj Iranit do të vazhdojë për disa javë. Trump tha se 48 udhëheqës iranianë janë vrarë në sulmet e SHBA-ve dhe Izraelit.
Kreu i Shtëpisë së Bardhë u shpreh i kënaqur për ecurinë e goditjeve deri tani. Gjithashtu, ai është shprehur se janë shkatërruar edhe 9 anije detare iraniane.
