Në Shqipëri pritet ekstradimi nga Italia i dy të dënuarve.
Si rrjedhim i bashkëpunimit mes Interpol Tiranës dhe Interpol Roma është bërë e mundur kapja e dy të dënuarve nga gjykatat shqiptare; përkatësisht Ardjan Hoxhaj, 49 vjeç, i cili është dënuar me mbi 16 vite burg për vrasje me dashje, në vitin 1995 dhe Arian Katreli, 50 vjeç, i dënuar për mashtrim nga Gjykata e Durrësit.
Njoftimi:
Interpol Tirana
Vijon bashkëpunimi me homologët, për kapjen dhe ekstradimin e personave të shpallur në kërkim ndërkombëtar.
Falë bashkëpunimit me homologët italianë janë kapur dhe ekstarduar nga Italia drejt vendit tonë, 2 shtetas të shpallur në kërkim ndërkombëtar.
Është ekstraduar nga Roma/Itali drejt vendit tonë shtetasi shqiptar Ardjan Hoxhaj, 49 vjeç, i shpallur në kërkim ndërkombëtar, pasi Gjykata e Apelit Vlorë e ka dënuar me 16 vjet e 8 muaj burgim, për veprën penale “Vrasje me dashje”, kryer në bashkëpunim.
Shtetasi Ardjan Hoxhaj, në vitin 1995, në Vlorë, ka vrarë duke e goditur me thikë në kraharor shtetasin A. A. dhe ka plagosur vëllanë e tij, shtetasin G. A.
Gjithashtu është kryer ekstradimi nga Italia drejt vendit tonë i shtetasit shqiptar Arian Katreli, 50 vjeç, të cilin Gjykata e Rrethit Gjyqësor Durrës e ka dënuar me 10 vite burgim, për veprën penale “Mashtrimi”.
Personat e ekstraduar në PKK Rinas i janë dorëzuar Drejtorisë së Përgjithshme të Burgjeve.
