Tashmë që kuqezinjtë janë eliminuar nga Europa League, rrezikojnë që të përballen me pasoja të rënda. UEFA nuk ka hequr dorë nga sanksionet e vendosura ndaj Milanit dhe si rrjedhojë në fund të sezonit nga skuadra do të duhet të largohet ndonjë nga yjet.
Sipas të përditshmes spanjolle “Don Balon”, skuadra e Atletico Madrid është hedhur në sulm për të afruar portierin e Milanit dhe kombëtares italiane Gianluigi Donnarumma. Portieri 19-vjeçar gjithnjë ka qenë i përfshirë në merkato, por këtë herë, duke parë dështimet e kuqezinjve, mund të largohet përfundimisht.
Trajneri Diego Simeone e kërkon me ngulm portierin e ri “azzurr”, duke qenë se portieri aktual Jan Oblak pritet të largohet nga “colchoneros” pas 4 sezonesh. Për këtë arsye, Simeone i ka “shkelur syrin” portierit të ri italian, duke qenë i gatshëm të paguajë çdo shumë për ta bindur si lojtarin ashtu edhe klubin kuqezi. Por nëse paratë nuk janë një problem i madh për Atletico Madrid “pengesa” kryesore do të jetë konkurrenca e madhe që është për Donnarumma, një nga portierët e rinj më premtues në botë, për të cilin ofertat nuk mungojnë.
