Barcelona – Inter është ndeshja më e pritur e vitit, jo vetëm për tifozët e skuadrave, por në mbarë botën. Mbrëmjen e kësaj të mërkure, katalanasit dhe zikaltërit do të luajnë aktin e parë drejt ëndrrës për finale e Champions-it. Blaugranat janë shfaqur si ekip pretendent dhe vijnë nga triumfi në Kupë kundër Realit.
“Për të gjithë është ëndërr të jemi këtu. Interi është një kundërshtar i vështirë, kanë një prej mbrojtjeve më të mira në botë. Na pret një sfidë e vështirë dhe duhet të jemi gati”, tha Hansi Flick, trajner i Barcelonës,
“Jam i motivuar dhe ndjej fluturat në stomak. Kjo është pozitive. Nuk ndjej frikë apo presion, po e shijoj këtë moment”, u shpreh Lamine Yamal.
Interi po kalon një periudhë jo të mirë. Ata u eliminuan nga kupa dhe u kaluan nga Napoli në kampionat.
“Luajmë në gjysmëfinalet e Champions dhe jemi entuziastë, pavarësisht javës së vështirë që kemi kaluar. Mund ta ndryshojmë ecurinë. Luajmë kundër një prej ekipeve më të mira në botë. I respektojmë, por nuk u trembemi”, shprehet Simone Inzaghi, trajner i Inter.
“Jemi të përqendruar, të motivuar dhe e presim me padurim ndeshjen. Luajmë një tjetër gjysmëfinale dhe sfidojmë një rival të madh”, shton Lautaro Martinez.
Gjysmëfinalja e parë e Champions ndërmjet Barcelonës dhe Inter luhet prej orës 21:00.
