Situata tek Inter sa vjen dhe bëhet më e rëndë, kjo jo për shkak të rezultateve por të rinovimit të kontratave. Fillimisht ishte Icardi dhe agjentja e tij Wanda Nara që nuk ranë dakord për rinovimin, duke kërkuar një rrogë të lartë, për të cilën pritet të ulen në bisedime javën në vijim. Por tani është edhe qendërmbrojtësi sllovak, Milan Skrinar i cili ka pretendime mbi rinovimin.
Sipas asaj që raportohet nga “Tuttomercato.web”, Skriniar ka shfaqur një kërkesë për një rrogë 4 milionë euro në sezon. Ai momentalisht merr 2.5 milionë euro, një shifër relativisht e vogël për një lojtar “shtyllë” të skuadrës.
Interi nga ana e saj ka reflektuar duke ofruar 3.2 milionë euro. Një diferencë jo e vogël kjo mes asaj që lojtari kërkon dhe asaj që skuadra ofron.
Skriniar, kujtojmë po luan sezonin e tij të dytë tek zikaltrit, pasi ka ardhur si një transferim shumë i mirë nga Sampdoria. Ai nuk ka zhgënjyer, përkundrazi është nga më të mirët në ekipin e drejtuar nga Spalletti.
