Arrestohet shtetasja britanike Harriet Bridgeman, e cila informonte grupin dhe ekzekutorin e biznesmenit Ardian Nikulaj, që u vra pak ditë më parë në Shëngjin.
Policia e Shtetit bën me dije se Bridgeman do të ekstradohet drejt Shqipërisë, ndërsa vijon puna për kapjen e autorit portugez Ruben Saraiva dhe një bashkëpunëtori britanik.
Më herët gjatë ditës së sotme u arrestua financuesi dhe organizatori i vrasjes së biznesmenit Ardian Nikulaj, Edmond Haxhia dhe dy informatorët britanikë, Thomas Mithan dhe Steve Hunt.
Njoftimi i Policisë:
Në vijim të punës kërkimore për lokalizimin dhe kapjen e personave të shpallur në kërkim për vrasjen e shtetasit Ardian Nikulaj, falë bashkëpunimit të ngushtë mes Policisë shqiptare dhe asaj britanike, pas shkëmbimit të informacionit, lokalizohet, kapet dhe vihet në pranga, me qëllim ekstradimin drejt Shqipërisë, shtetasja britanike H. B.
Ndërkohë, Policia e Shtetit vijon intensivisht punën, në bashkëpunim të ngushtë me partnerët, për lokalizimin dhe kapjen edhe të 2 personave të tjerë të shpallur në kërkim në lidhje me ngjarjen.
