Komisioni i Disiplinës dhe Etikës në Federatën Shqiptare të Futbollit ka vendosur masa ndëshkuese pas akteve të dhunës të ndodhura në ndeshjen e kampionatit “Abissnet Superiore” ndërmjet KF Egnatia dhe FK Partizani, e zhvilluar më 3 prill 2025 në stadiumin “Arena Egnatia”.
Sipas njoftimit zyrtar të FSHF-së, pas shqyrtimit të dokumentacionit dhe korrespondencës me Drejtorinë Vendore të Policisë Durrës, si dhe në përputhje me nenet 48 e vijues të Ligjit “Për Sportin” dhe nenet 59 e vijues të Kodit të Disiplinës dhe Etikës, u vendos:
Ndalimi i hyrjes në stadiumet e futbollit të Republikës së Shqipërisë për një periudhë të pacaktuar kohe për tifozët Redon Kujtim Dine dhe Joneld Dionis Jeshili.
Të dy personat janë identifikuar si tifozë të KF Egnatia.
Gjithashtu, në bazë të Nenit 7 të Kodit të Disiplinës dhe Etikës, FSHF ka udhëzuar të gjithë anëtarët që administrojnë stadiume të garantojnë zbatimin e këtij vendimi, ndërsa një kopje e tij do t’i përcillet edhe Policisë së Shtetit.
