Ilir Meta kërkon zëvendësim të masës së sigurisë arrest bë burg caktuar nga Gjykata e Posaçme në tetor të vitit të kaluar. Mbrojtja e Metës konfirmon se ka dorëzuar të enjten kërkesën për verifikim kushtesh dhe zëvendësim të masës së sigurisë nga arrest në burg në një masë tjetër më të butë.
Në argumentet e mbrojtjes pretendohet se në rastin “Meta” janë shkelur afatet duke kaluar 8 muaj dhe në asnjë rast nuk është paraqitur nga SPAK informacion dy mujor mbi çështjen.
Gjithashtu, në argumente janë parashtruar edhe disa vendime të GJEDNJ, si raste analoge mes të cilave edhe dosja “Gëllçi”.
Disa ditë më parë, avokati i Metës Kujtim Cakrani tha se SPAK i komunikoi zgjatjen e afateve të hetimit të mbrojturit prej tij, teksa ende ndaj këtij vendimi, nuk është bërë ankim nga mbrojtja. Ilir Metës dhe deputetes Monika Kryemadhi i janë komunikuar akuzat në limitet e afateve hetimore.
Pak ditë më parë, avokati Kujtim Cakrani u paraqit në Gjykatë ku tërhoqi disa akte të cilat sipas tij do të përdoren në kërkesën që do ti drejtohet Gjykatës Kushtetuese për të kundërshtuar masën e sigurisë që e konsideron të paligjshme. Depozitimi i kërkesës në Kushtetuese tha avokati Cakrani do të bëhet javën e ardhshme.
