Ikën BBC, Perez projekton tre lëvizjet e “çmendura” për merkaton e verës

Real Madrid është ekip me ambicie gjithmonë të larta dhe presidenti Fiorentino Perez ka hartuar në kokë se çfarë duhet të bëjë për të nxjerrë nga kriza madrilenët. Pika më e dobët e tyre është sulmi, faza ku gjithmonë janë investuar shuma marramendëse.

“Los Blancos” kanë qenë teleshikues në merkatot e fundit, duke parë Barcelonën e PSG të investojnë dhe të përforcohen. Ndërsa në verë mendohet që të jetë momenti i tyre, për të bërë disa goditje të mëdha që do ta përforcojnë ekipin. Ndryshimi pritet të jëtë drastik, raporton “Marca”, pasi në Madrid pritet të ndryshojë komplet formula nga BBC në NHL.

Flitet që Perez ka dhënë “ok” për largimin e Ronaldos. Nëse largohet një yll i tillë, atëherë Benzema dhe Gareth Bale nuk do të jenë më të vështirë për tu larguar, edhe pse kjo treshe ka drejtuar ekipin në suksese të mëdha. Lista e dëshirave të presidentit është me yjet më në zë të momentit, ku padyshim Neymar qëndron në majë, për tu pasuar nga Mbappe dhe Eden Hazard. Galaktikë në gjithë kuptimin e fjalës. Braziliani, francezi dhe belgu janë përfolur edhe më parë të veshur fanellën klubit spanjoll.

Hazard në një intervistë së fundmi është shprehur se ka dëshirë të bashkëpunojë me Zidane dhe kjo është një hap i madh. Ndërsa Neymar ka qenë shumë i lidhur me një kalim në “Bernabeu” dhe flitet që e tillë ka qenë strategjia për të mos bërë një kalim direkt nga Barcelona tek Real Madrid. Lewandowski është një tjetër prioritet nëse nuk arrin ti rrëmbejë të dy yjet parisienë, ku më i vështirë duket Mbappe.