Nga merkato e janarit tifozët e Interit prisnin shumë, pasi drejtuesit e rinj ua kishin dhënë një shpresë të tillë edhe pse jo në mënyrë direkte. Zikaltërit dominuan gjatë fazës së parë duke treguar një formë të lartë dhe duke qëndruar për disa javë të pamposhtur, por dhjetori ishte muaji i zi për ta. Objektivi i Interit këtë sezon është Champions League edhe pse filluan të besopnin për titullin kampion, por edhe atë e kanë të vështirë tashmë.
“Detyra e parë që drejtuesit duhet të zbatojnë në këto javë është që të shkojnë drejt Romës dhe t’i rrëmbejnë Lazio-s, Igli Taren. Me ardhjen e drejtorit sportiv bardhekaltër dhe me në krah një si Valter Sabatini, drejtori aktual Piero Ausilio mund të përdoret për të përgatitur kafenë në klub”, – është ky komenti i tifozëve të Interit pas një merkatoje, e cila për zikaltrit premtoi shumë, por realizoi pak.
Ëndrra e interistëve ishte Pastore i PSG, pasi edhe ky i fundit dëshironte një kalim tek italianët, por pronarët kinezë “Suning” nuk e miratuan shumën e kërkuar nga parisienët. Afrimet e vetme ishin kërkesat e Spallettit një qendërmbrojtës dhe një mesfushor. Kjo ka nervozuar tifozët të cilët kërkojnë që lëvizja e parë që duhet bërë është afrimi i Igli Tares si drejtor teknik dhe e quajnë si shpëtimtarin e Interit. Ai prej vitesh, ndërton fatet e arkave të Lazio-s, duke sjellë futbollistë nga hiçi dhe i kthyer në yje në Romë.
