Gazetari dhe publicisti shqiptar i njohur Emin Azemi, themelues i gazetës “Fakti” në Maqedoni, shprehet për faktor.al mbi çështjen e fundit në Kosovë, që ka përfshirë të gjitha qarqet intelektuale, nacionaliste, politike dhe mediatike mbi korrigjimin ose/apo ndarjen e territoreve me Serbinë.
Si e komentoni ju, qëndrimin e presidenti të Kosovës për marrëveshje me Serbinë për korrigjim të kufijve, në kushtet kur Serbia nuk e njeh Kosovën?
Emin Azemi: Qëndrimi i Presidentit të Kosovës vuan nga një informacion më i plotë për të qenë plotësisht i qëndrueshëm në rrafshin argumentues. Përderisa ky është një qendrim i shprehur në media, e jo një platformë e strukturuar institucionalisht, dhe përderisa na mungon terësia e kësaj çështjeje, ku parasegjithash kam parasysh qëndrimet e Beogradit zyrtar dhe të faktorit ndërkombetar, sidomos atij Amerikan, mund të themi se ky është një qëndrim i njëanshëm , me shumë të panjohura dhe si i tillë nuk mund të prodhojë ndonjë debat transparent e konstruktiv. Ideja që ka prezantuar tash së fundmi Thaçi nuk është e re. Në Kosovë i pari nga politikanet e ka prezantuar Nenkryetari i LDK dhe kryetari aktual i Gjilanit, Lutfi Haziri, kurse prej botës intelektuale akademik Rexhep Qosja.
Cilat janë të panjohurat e idesë së Thaçit për shkëmbim territoresh:
Çka do ti merret Kosovës në këmbim të territoreve të pretenduara në Luginen e Preshevës?
Sa është e involvuar diplomacia ( e fshehtë)Perendimore sidomos ajo Amerikane në këtë proces?
Ku është roli i Tiranës zyrtare në këtë çështje?
A mund të prodhojë efekt domino kjo ide , sidomos në Maqedoni dhe Bosnje?
A mundet të involvohet faktori rus në emër të njëfarë paternalizmi pansllavist , duke krijuar do ballanca të reja në rajon?
Pra, ideja në këtë fazë fillestare më tepër ka nxitur fantazi për një sinopsis skenari që nuk i dihet mirëfilli syzheu, sidomos nuk i dihen konturat që e bëjnë këtë kohezion midis idesë dhe veprimeve konkrete politike.
Cili është sensibiliteti i intelektualëve shqiptarë në Maqedoni për retorikën e presidentin Thaçi ndaj akuzave, se kjo në të vërtetë është ndarje kufijsh me Serbinë?
Në Maqedoni nuk ka ndonjë opinon të formuar mbi këtë çështje, por jam i bindur se do të ketë zëra që do të kërkojnë një model të ngjashëm që do të shtrihej edhe në Maqedoni.
Nuk jam i sigurt nëse këta zëra do të jenë dominues, për arsye se logjika i veprimit legal poltik në Maqedoni ndjek disa parametra tjerë ku dominon fryma e ruajtjes së pacenueshmërisë së territorit të Maqedonisë. Me siguri do të ketë ambicie të shtuara për një rikonfigurim të brendshëm të administrimit, duke ngritur në një shkallë më të lartë rolin e pushtetit lokal dhe ndarjen e Maqedonisë në rajon apo qarqe , si një shans më real për vendosjen e balancave midis pushtetit qendror dhe atij lokal, ku faktori shqiptar do të kishte një autonomi më të madh vendimmarrës në administrimin e resurseve financiare, natyrore, ekonomike, njerëzore etj./Faktor.al
