Wanda Nara, bashkëshortja dhe njëkohësisht agjentja e kapitenit të Interit, Mauro Icardi tronditi tifozët zikaltër me deklaratat që bëri në emisionin “Tiki-Taka” të hënën në mbrëmje. Ajo u shpreh se klubi e kishte shitur sulmuesin argjentinas te Juventusi në merkaton e verës, por Icardi kishte refuzuar.
Në lidhje me këto deklarata Inter ka reaguar nëpërmjet drejtorit sportiv, Piero Ausilio, i cili theksoi se Icardi kurrë nuk do të shitet te Juventus dhe këto gjëra nuk diskutohen në rrjete sociale apo TV, por në vendet e duhura.
“Janë deklarata të ekzagjeruara dhe unë mund të them se Icardi nuk do të shkojë kurrë tek Juventusi. Ata kanë refuzuar një ofertë të parë, ne duam t’i rinovojmë dhe përmirësojmë kontratën, por nuk mund të flasim për këtë në rrjetet sociale ose në televizor. Ne jemi koherentë dhe shumë të lumtur me Icardin, i cili nuk ka frikë nga asgjë dhe merr përgjegjësitë që i takojnë.
Unë jam në zyrë çdo ditë në dispozicion të çdo menaxheri. Oferta që i kemi bërë para dy muajsh është refuzuar, por dëshira jonë është të vazhdojmë negociatat. Transferimi tek Juventus? Nuk komentoj dhe i fus një të qeshur. Nuk ka qenë kurrë afër Juventusit.”
Ndër të tjera ai shtoi Inter ka dëshirën për të vijuar negocimin e rinovimit të kontratës, ndërsa shtoi se për merkaton e janarit nuk kanë plane të mëdha, pasi e konsiderojnë skuadrën të kompletuar dhe konkurruese me kontingjentin që kanë aktualisht.
