Sulmuesi i Interit, Mauro Icardi ka hedhur poshtë zërat se do të largohet nga klubi zikaltër në fund të muajit, për t’iu bashkuar Real Madridit.
Ishte gazetari spanjoll Pipi Estrada ai që përhapi “alarmin” për tifozët interistë, teksa deklaroi se Reali kishte një marrëveshje prej 92 milionë euro me Interin.
Megjithatë, është vetë sulmuesi ai që ka quajtur “budallalliqe” thashethemet se në fund të vitit do të kryente vizitat mjekësore te Real Madrid.
I pyetur nëse nuk kishte ndërmend të largohej, Icardi u përgjigj:
“Jo, kurrë! Nuk flas për merkato, nëse dikush ka diçka me mua duhet të flasë me shoqërinë dhe agjentin tim. Unë jam mirë këtu ku jam dhe dëshiroj pafundësisht të fitoj diçka të rëndësishme me këtë fanellë. Scudetto jonë është rikthimi në Champions League. Pastaj nëse afër fundit do jemi sërisht në vënd të parë ndoshta mund ta rimendojmë (qesh)”.
