Prokuroria e Posaçme ka lëshuar një tjetër urdhër arresti për Ervis Martinajn, sikurse raporton gazetarja Klodian Lala. Edhe pse prej gushtit të kaluar nuk dihet asgjë për bosin e lojërave të fatit, emri i tij është pjesë e mega operacionit policor të bërë mëngjesin e sotëm ku në pranga ranë Oltion Bistri, Xhevahir Lila dhe Pëllumb Gjoka.
Duket se ky grup i strukturuar kriminal ka të përfshirë shumë emra të njohur, teksa me Ervis Martinajn shkon në 15 numri i urdhër arresteve të lëshuara nga Prokuroria e Posaçme. Gjithashtu policia ka kryer edhe kontrolle në shtëpitë e bosit të lojrave të fatit.
Kujtojmë që Ervis Martinaj ishte shpallur në kërkim ndërkombëtar në kuadër të operacionit “Plumbi i Artë”. Asokohe ishte Nuredin Dumani, i penduari i drejtësisë i cili tregoi se ishte paguar nga bosi i lojërave të fatit me 500 mijë euro për të kryer një vrasje.
Megjithatë prej gushtit të vitit të shkuar, Martinaj është zhdukur duke mos lënë asnjë gjurmë. Policia nuk ka dalë me një version zyrtar, teksa familjarët pretendojnë se është vrarë nga grupet rivale. Por, sot ka ridalë në skenë sërish emri i tij me mega operacionin e zhvilluar nga SPAK në bashkëpunim me policinë.
Dyshohet që ky grup kriminal është përfshirë në vepra penale të vrasjes dhe urdhërimit të tyre, pastrimit të parave dhe lojërave të fatit.
