Cristiano Ronaldo çdo ditë që kalon është më larg Real Madridit dhe këtë e ka konfirmuar edhe vetë presidenti Florentino Perez. Portugezi është kthyer në një idhull të tifozëve madrilenë, të cilët gjatë viteve që CR7 luajti në Bernabeu ka fituar shumë trofe. Divorci tashmë duket i pashmangshëm, ndërsa Pereza e ka tensionuar më shumë situatën me deklaratën e fundit, ku i kërkon Ronaldos që të dalë e të flasë publikisht duke treguar arsye se përse po largohet.
Të gjithë i janë sulur Perezit dhe akuzojnë atë si fajtorin për largimin e Ronaldos drejt Juventusit. Presidenti për të larguar barrën nga shpatullat e tij ka dalë me disa deklarata të forta, duke fajësuar Ronaldon për këtë largim dhe në një farë mënyre i kërkon të japi llogari.
“Dua të di se përse Ronaldo po largohet. Nëse dëshiron të ikë, e ftoj që ta bëjë këtë gjë publikisht. Nëse do ta bëjë këtë gjë, do ta lë të lirë. Unë dua që të jetë vetë futbollisti ai që ta shpjegojë arsyen e këtij divorci, duke marrë përsipër ai përgjegjësitë”, ka deklaruar presidenti Florentino Perez.
Duke se tifozët dhe mediat spanjolle e konsiderojnë presidentin fajtor që nuk e mbrojti në çështjen e detyrimeve, ndaj dhe Ronaldo kërkoi 30 milionë euro në sezon. “Marrëdhënia mes nesh ka kohë që është e tensionuar”, ka pranuar Perez, që duket se ka vendosur të ulë edhe klauzolën e largimit të sulmuesit portugez në 120 milionë euro. Ndaj dhe Juventus është hedhur në sulm për ta sjellë 5 herë fituesin e Topit të Artë në Torino, duke i bërë një ofertë të parë Realit.
