Juventusi e ka nisur mjaft mirë mbrojtjen e titullit në Serie A, pasi ka fituar dy ndeshjet e para. Bardhezinjtë janë përforcuar shumë me ardhjen e Cristiano Ronaldos, por edhe pas rikthimit të Leonardo Bonuccit. Ai u rikthye në Torino pas një sezoni me Milanin, por nuk është pritur aspak mirë nga tifozët e “Zonjës së Vjetër”.
Gjatë periudhës që luante për kuqezinjtë, ku mbante dhe shiritin e kapitenit Bonucci shënoi ndaj Juventusit në “Allianz Stadium” dhe festoi duke mos treguar respekt për ish-skuadrën e tij.
Në dy ndeshjet e parë këtë sezon që është rikthyer tek Juventusi ai është fërshëllyer nga tifozët për këtë fakt. Për këtë arsye ai pas ndeshjes me Lazion, ku fituan 2-0 është drejtuar nga tribunat e ultrasve dhe iu kërkoi falje atyre dhe përgjigjja e shumicës së tyre ishte me duartrokitje.
Trajneri i Juventusit, Massimiliano Allegri i është vënë në mbrojtje qendërmbrojtësit duke thënë se ata do ta falin. “Do të marrë kohë por tifozët do ta falin Bonuccin”, ka thënë Allegri.
